Mester entregá tur petishon pa pèrmit i notifikashon den kuadro di Algemene Politie Keur (Ordenansa General di Polis) i pèrmit di bufèt pa aktividat den periodo di 16 di desèmber 2022 te ku 15 di yanüari 2023 pa mas tardá 18 di novèmber 22 digitalmente via e wèpsait https://bonairegov.com/ondernemers/vergunningen. Ta trata akí di entre otro petishon pa pèrmit pa organisá un entretenimentu públiko, un aktividat ku ta aksesibel pa públiko i/òf toka músika, por ehèmpel den kaso di presentashon di grupo di gaita, aguinaldo, barí i tambú. Petishon pa pèrmit di bufèt tambe ta kai bou di esaki.
No ta duna pèrmit pa presentashon di grupo musikal na e siguiente sitionan: henter Kaya Korona, Ons hoekje na Kaya Avelino J. (Abechi) Cecilia, skina di Kaya L.D. Gerharts i Kaya Lib. Simon Bolivar (ántes Swiss Châlet i Super Corner), skina di Kaya Grandi i Kaya L. D. Gerharts (Centro), Kaya Nikiboko Nort i Kaya Nikiboko Sùit i Kas di Hadrei, (Cosy Corner) na Kaya Minguel Pourier. Ta pèrmití presentashon na kiosko na Plaza Fraternan di Tilburg solamente riba djadumingu, pero no durante e oranan ku ta tene santu sakrifisio di misa den Misa San Bernardo.
Minimalmente dos dia promé ku un presentashon mester anunsiá e presentashon akí na departamento di tráfiko di Kuerpo Polisial Hulanda Karibense. Den kaso di un presentashon na kiosko na Plaza Fraternan di Tilburg mester anunsiá esaki por lo ménos un (1) siman adelantá na departamento di tráfiko di Kuerpo Polisial Hulanda Karibense.
Gezaghèber ta anunsiá alabes ku pa bendementu i tiramentu di vürwèrk di parti di negoshinan i similar riba òf kantu di kaminda públiko un pèrmit (pa benta kantu di kaminda) ta un eksigensia. Interesadonan mester entregá un petishon pa esaki pa mas tardá 18 di novèmber 2022 digitalmente via e wèpsait https://bonairegov.com/ondernemers/vergunningen. Banda di e pèrmit (pa benta kantu di kaminda) akí konforme artíkulo 3 di Dekreto di Vürwèrk Boneiru, mester notifiká aktividatnan relashoná ku bendementu, almasenamentu i transporte di vürwèrk na Kolegio Ehekutivo.
Relashoná ku gastunan di limpiesa e persona ku ta hasi petishon mester tuma kontakto adelantá ku Selibon NV (717 – 8159). Huntu ku e petishon mester entregá un prueba ku a paga e gastunan di limpiesa òf un suma di garantia.
Meta di e areglo akí ta pa adelantá haña un impreshon di e kantidat di aktividat ku ta bai organisá durante e periodo for di 16 di desèmber 2022 te ku 15 di yanüari 2023 relashoná ku mantenshon di òrden públiko, trankilidat i siguridat.
Pa hasi petishon pa e pèrmitnan mester hasi uso di un formulario ku por haña riba e wèpsait https://bonairegov.com/ondernemers/vergunningen. Personanan ku a entregá petishon pa un pèrmit di APK i/òf bufèt promé ku 18 di novèmber 2022 mester buska e pèrmit akí pa mas tardá 16 di desèmber 2022 na departamento di asuntunan hurídiko i general, na Kaya Industria Pariba 28. Si bo no tin un pèrmit rekerí den bo poseshon, bo ta violando lei. Den kaso di violashon di lei ta tuma medida a base di lei atministrativo òf lei penal kontra e persona ku a violá lei.
Despues di 19 di novèmber 2022 no ta tuma petishon pa pèrmit òf notifikashon pa aktividat planiá den periodo for di 16 di desèmber 2022 te ku 15 di yanüari 2023 den tratamentu.
Gezaghèber ta supliká tur hende pa tene kuenta ku e términonan menshoná akí riba i kumpli ku esakinan. Por haña mas informashon na departamento hurídiko i asuntunan general (JAZ), number di telefòn 715 – 5330 ekstenshon 5321 òf 2137.
