Den Rijksmuseum van Oudheden na Leiden resientemente Reina Máxima a habri e eksposishon Boven het Maaiveld, kaminda nan ta eksponé hayasgonan arkeológiko remarkabel di e último 25 aña – tantu for di Hulanda Oropeo komo for di e islanan karibense, entre otro Boneiru. Diputado Nina den Heyer i direktor di BONAI Laurianne Ammerlaan tabata presente na nòmber di Boneiru.
Pa Boneiru e eksposishon ta mustra un kolaborashon spesial entre organisashonnan karibense di patrimonio i Rijksmuseum van Oudheden. Bonerianonan mes, entre otro FuHIKUBo i BONAI, a skohe e ophetonan i storianan selektá i a duna splikashon tokante esakinan. Durante e apertura profeshonalnan di patrimonio for di Karibe a papia ku Reina Máxima tokante nifikashon di e ophetonan. Un piesa notabel ta un hanger raro di karnalina for di mas òf ménos aña 1200 pa 1400, ku nan a koba saka na Boneiru na aña 2022. E hayasgo akí ta konta nos tokante konekshonnan históriko entre nos islanan i Sur Amérika.
E buki di eksposishon ta tira lus tambe riba temanan mas amplio, manera kolonialismo, historia oral i storianan di famia. Ta pasa e storianan akí, ku hopi biaha no ta skirbí, via investigashon genealógiko i arkeologia. Entre otro e arkeólogo Daudi Cijntje, kende a kordiná e ophetonan di nos islanan, a papia tokante esaki.
Proyekto nobo di patrimonio: Protehá mi
Habitantenan di Boneiru por partisipá den ‘Protehá mi’. Esaki ta un proyekto nobo ku ta brinda profundisashon di konosementu den nifikashon di patrimonio pa komunidat boneriano. Sentral ta preguntanan manera: kon ta eksperensiá patrimonio, kua ta e sitionan di hayasgo ku ta konosí, i kon por kompará esakinan ku storianan personal di famia? E proyekto ta un inisiativa di Laurianne Ammerlaan di BONAI, Daudi Cijntje di Archol i Maaike de Waal di Universidat di Leiden / ARGEOgraph. E Agènda di Ehekushon Faro di Servisio di Reino pa Patrimonio Kultural i e Fondo Mondriaan a hasi e finansiamentu posibel. E Tratado di Faro ta pone hende i komunidat sentral í nan relashon ku patrimonio.
E kuater tayernan akí ta forma e ‘kick-off’ di e proyekto na Boneiru:
• Arkeologia: djasabra 31 di mei, Sociedad San Antonio de Padua na Rincon
• Investigashon di antepasado: djasabra 7 i 21 di yüni na Biblioteka Públiko Boneiru
• Arkeologia: djasabra 14 di yüni na Mangazina di Rei, Rincon
Por registrá via:
Klek akinan pa e formulario di registrashon
Òf via Lauriane Ammerlaan (BONAI): +599 795 1425 / info@bonaibonaire.com
Pa skol
Tur skol di Boneiru por hasi petishon pa un rekorido digital grátis atrabes di e eksposishon. Registrá via Alfrida Martis: alfrida.martis@bonairegov.com
Palabra di gratitut
Ku gran apresio Entidat Públiko Boneiru ta gradisí tur hende ku a kontribuí na visibilidat i fortifikashon di nos patrimonio karibense na ‘Boven het Maaiveld’:
Daudi Cijntje (Archol), Lauriane Ammerlaan (BONAI), FuHiKuBo, Jay Haviser (SIMARC/BONAI), Sharifa Balfour (Saba Heritage Center), Raimie Richardson (Entidat Públiko St. Eustatius), Raymundo Dijkhoff (NAMA), Allan van der Ree (Battle Station Blaauw), i for di Rijksmuseum van Oudheden: Ivo van Wijk i Tanja van der Zon. Nan dedikashon, konosementu i enbolbimentu ta hasi e trabou akí posibel.
Pregunta i kontakto:
• Tokante Protehá mi: Lauriane Ammerlaan, BONAI: info@bonaibonaire.com /
+599 795 1425
• Tokante patrimonio i kultura na Entidat Públiko Boneiru: Alfrida Martis: alfrida.martis@bonairegov.com
