Ta importante pa biaheronan ku ta bai den eksterior pa trabou òf fakansi plania nan bakunashon di biahe na tempu. Esaki departamento di Salubridat Públiko ta duna di konosé. Hopi biaha ta sosodé ku biaheronan ta mèldu nan mes un dia promé ku salida pa eksterior pa konseho tokante bakunashon di biahe. Despues di un bakunashon bo kurpa tin mester di tempu pa produsí protekshon kontra e malesa. Si un hende biaha mesora despues di bakunashon, ta dura un ratu promé ku e persona ta protehá. Pa biaha na un manera seif, ta importante pa traha un sita na tempu via e number di telefòn (+599) 715 5324.
Kentura hel den Suramérika
Na e momentu akí tin un brote di kentura hel den e áreanan São Paulo, Brazil i Tolima, Colombia. Kentura hel ta un malesa grave. Outoridatnan lokal a tuma medida pa prevení mas plamamentu. Departamento di Salubridat Públiko ke trese bakunashon kontra kentura hel na un manera èkstra bou di atenshon di biaheronan pa Suramérika. Ta importante pa pasa e angua kontra kentura hel por lo ménos 10 dia promé ku salida. E angua kontra kentura hel ta ofresé protekshon kontra e malesa pa bida largu.
Otro konsehonan di biahe di Salubridat Públiko
Den eksterior ta eksistí otro tipo di malesa kompará ku Boneiru. Algun di nan ta peligroso, manera kentura hel, hepatítis (dehel) òf tífùs di barika. Kada pais tin un otro konseho di biahe. Departamento di Salubridat Públiko ta konsehá biaheronan tokante bakunashon, pero nan ta duna otro konseho di biahe tambe. Algun ehèmpel:
- Aparte di sangura, pushi, kachó, makaku i raton djanochi tambe por transmití malesa. Departamento di Salubridat Públiko ta konsehá biaheronan tokante kiko ta e mihó kos ku nan por hasi ora bestia morde òf uña nan.
- Sierto hende ta haña molèster di malesa di altura ora nan biaha bai áreanan haltu, manera Machu Picchu na Perú òf La Paz na Bolivia. Departamento di Salubridat Públiko ta duna konseho pa evitá malesa di altura i ta konsehá kiko mester hasi ora tin keho di malesa di altura.
- Malaria ta aparesé hopi den Amazona. Píldora di malaria por yuda pa prevení kontagio ku malaria. Departamento di Salubridat Públiko ta konsehá biaheronan ku ta biaha pa áreanan kaminda tin malaria i ta duna resèpt tambe pa píldora di malaria.
Yama e number di telefòn +599 715 5324 pa un sita pa konseho di biahe.
