GGD Boneiru ta pidi biaheronan pa Suramérika pa pasa angua kontra kentura hel por lo ménos 10 dia promé ku salida. Na Bolivia, Brasil, Colombia, Ecuador, Guyana i Perú tin brote di kentura hel. Algun persona a fayesé debí na e malesa akí. Biaheronan pa Suramérika por buska un konseho personal di biahe na GGD i pasa angua kontra kentura hel. Durante ora di ofisina nan por yama e number di telefòn +599 715 5324 pa traha un sita.
Kiko ta kentura hel
Kentura hel ta un malesa tropikal grave. Ora un hende ta malu, e persona ei su kueru di kurpa òf su blanku di wowo ta bira hel, loke nan ta yama dehel tambe. Un persona ku ta gravemente malu por haña problema ku higra òf sangramentu den su kurpa òf asta e por fayesé. No ta eksistí un tratamentu pa kentura hel, pero ku un angua kontra e malesa akí, un hende ta protehá pa bida largu.
E sangura Aedes aegypti ta plama kentura hel. Esaki ta e mesun sangura ku ta plama dengue, chikungunya i zika. Tin e sangura akí na Boneiru, awor akí den e lunanan mas seku ku tin ménos áwaseru ta kai tambe. Pa un bon protekshon ta importante pa usa un krema òf ‘spray’ kontra sangura ku ta kontené DEET. Ta importante tambe ku bo pañanan ta tapa tur bo kurpa bon, i ku hende no tin awa ku ta para ketu rònt di nan kas.
GGD Boneiru
GGD Boneiru ta duna konseho personal di biahe i nan ta ofresé diferente bakunashon, esta angua kontra malesa. GGD ta sòru pa nan ta bon na altura si internashonalmente tin riesgo pa salú di biahero i habitante.
Wak pa bo ta na tempu!
Despues di pasa angua un hende su kurpa tin mester di tempu pa e protekshon traha bon. Ta importante pa buska e angua kontra kentura hel por lo ménos 10 dia promé ku salida.
Pa mas informashon òf pa traha un sita, biaheronan por tuma kontakto via +599 715 5324.
