Mas òf ménos 70% di tur alumno i studiante di 13 te ku 17 aña den luna di sèptèmber di e aña akí a partisipá na un investigashon tokante nan salú. Pan American Health Organization, PAHO, a organisá e investigashon mundialmente. Na Boneiru departamento di Salubridat Públiko a hasi e investigashon. E investigashon akí a konsistí di pisamentu i midimentu di e hóbennan. I di kontestá pregunta riba papel, e hóbennan no tabatin mester di skirbi nan nòmber riba e blachi di kontesta. E preguntanan tabata entre otro tokante tentamentu (riba medionan sosial), droga, emoshon, seksualidat, kome i bebe i moveshon.
Departamento di Salubridat Públiko ta hopi satisfecho ku partisipashon di e hóbennan, asina Michael Mercuur, hefe interino di e departamento a deklará. ‘Mi ke gradisí tur hóben ku a tuma tempu pa kontestá e preguntanan. Nos tin mester di informashon di e hóbennan pa sòru ku den futuro nos por tene mas tantu kuenta ku nan situashon. Tambe mi ke yama danki na tur skol di enseñansa avansá, MBO, departamento di Edukashon i Bienestar, BESt4Kids, fundashon Akseso, Indebon i ministerio di Enseñansa, Kultura i Siensia. Esaki pa nan yudansa pa hasi e investigashon posibel.’
E hóbennan tabata krítiko tokante e preguntanan ku nan mester a kontestá. Por ehèmpel empleadonan di Salubridat Públiko a haña e pregunta, dikon nan mester a duna kontesta dos biaha riba e mesun tipo di pregunta. ‘Òf ta reshèrshi boso ta ku ke kontrolá si e kontestanan ta kuadra ku otro?’, asina nan a puntra e empleadonan.
Tambe e hóbennan tabata ke e siguransa ku nan mayornan lo no haña e kontestanan pa lesa. Òf nan tabata ke sa kon ta anda ku nan informashonnan, despues di yena e kontestanan. Despues di a kontestá e preguntanan, e hóbennan mes a hinka nan blachi di kontesta den un kaha spesial pa kolektá e blachinan. Ku un servisio di entrega lihé a manda tur e blachinan di kontesta Ginebra den un ènvelòp será pa prosesá e kontestanan.
Departamento di Salubridat Públiko ta ferwagt di haña resultado di e investigashon na luna di yanüari 2024. E intenshon ta pa informá tur hóben ku a partisipá na e investigashon tokante e resultado.
