Kralendijk – Ta renobá Sentro di bario Nikiboko kompletamente. Esaki ta parti di palabrashon hasi entre diputado Nina den Heyer i Ben Oleana di Fundashon Cas Boneriano ku a keda firmá durante un seremonia na kantor di Kolegio Ehekutivo. Aparte di e sentro di bario Nikiboko a palabrá di pone atenshon i mantenshon na sentronan di bario na Nort'i Saliña, Amboina, Tera Kòrá i Antriol / Family Justice Center.
Komo parti di e proyekto di desaroyo integral di bario (integrale wijkontwikkeling) di Direktorado di Komunidat i Kuido, a traha un programa dirigí riba trabou komunitario, trabou di bario i bida den bario. E trabounan de FCB lo inkluí e drechamentu i mantenshon di e sentro di barionan.
E proyekto di desaroyo integral pa barionan (IWO), tin atenshon tantu pa e aspektonan físiko komo e aspektonan sosial den bario. Tur esaki pa mehorá e kalidat di bida di e habitante nan den e bario. Mirando ku e sentro di bario ta hunga un papel importante den esaki, Entidat Públiko Boneiru a opta pa duna prioridat na e renobashon di e sentro di barionan pa nan por fungi atrobe komo lugánan di enkuentro unda hóbennan i mayornan ta bini huntu pa siña i dibertí. Tin ku pensa riba entre otro aktividatnan manera kurso di mekániko, baile, arte, kultura i músika, èts.
Ademas, e sentro di barionan tin un papel speshal den e promoshon, stimulá protekshon di kultura di Boneiru i na mes momento, pone énfasis riba un sosiedat multikultural positivo ku un koheshon sosial fundamental.
E koheshon sosial ta un di e pilarnan di desaroyo di e kalidat di bida den e barionan; unda e habitante nan ta biba huntu kómodamente i tin e mesun oportunidatnan pa bienestar i prosperidat.
Ademas, e koheshon sosial di habitante nan ta funshoná komo un elemento fundamental pa desaroyo sosial di henter Boneiru. Esaki ta kontribuí na e desaroyo ekonómiko sostenibel riba e isla, perseverando asina e naturalesa i e kultura.
FCB ta kuminsá dentro di poko ku e trabounan di renobashon na e sentro di bario Nikiboko, pa pronto e bario por disfrutá di un bunita sentro di bario.
