Ku inisio di Kampionato Mundial di Futbòl di FIFA e siman akí, ta kuminsá un periodo den kua Boneiru tambe lo selebrá futbòl. Durante e simannan binidero desénas di pais ta kompetí pa e título mundial. Pa hopi fanátiko na nos isla e Kampionato Mundial akí tin un nifikashon spesial: e tim nashonal di nos isla ruman Kòrsou pa promé biaha tin representashon riba esenario mundial.
Na diferente sitio, entre otro den sentro di siudat, nan ta organisá fiesta di wak futbòl i otro tipo di evento. Banda di esaki na hopi establesimentu di hóreka por mira e weganan riba pantaya grandi, loke segun espektativa ta bai sòru pa aglomerashon i ambiente èkstra den kaya.
Gezaghèber ta hasi un yamada riba nos habitantenan, bishitantenan i fanátikonan di futbòl pa huntu sòru pa un periodo di Kampionato Mundial festivo i seif. Selebrá e éksitonan ku rèspèt pa otro, tene kuenta ku e bisindario i evitá molèster. Huntu nos ta sòru pa e periodo akí bira un eksperensia positivo pa tur hende na nos isla.
Responsabilidat di empresarionan di hóreka
Durante e temporada akí, empresarionan di hóreka i organisadónan ta hunga un ròl krusial den salbaguardiá òrden públiko i siguridat. Ta verwagt di nan ku na un manera aktivo i visibel nan ta tuma medida pa protehá nan wéspetnan i e bisindario direkto. Esaki ta nifiká entre otro ku nan ta regulá fluho di bishitante, hasi uso di sufisiente supervishon i evitá molèster di zonido i polushon. E pèrmit ta obligá empresarionan pa no solamente laga e aktividatnan den nan negoshi kana seif, pero tambe pa pèrkurá pa òrden i limpiesa den nan bisindario direkto. Kaminda ta nesesario nan tin ku intervení na tempu.
Yamada na bishitantenan
Ta rekordá bishitantenan di partikularmente nos sentro di siudat ku reglanan di tráfiko ta keda na vigor sin restrikshon. No stashoná outo kaminda no ta pèrmití pa hasi esaki. E ta stroba servisionan ousiliar i otro usuarionan di kaminda. Violashon por kondusí na un atvertensia, un multa òf toumentu di outo. Gosa di e Kampionato Mundial akí, apoyá bo tim i selebrá huntu, pero hasi esaki na un manera responsabel. Solamente ku esfuerso di tur hende, durante e periodo di Kampionato Mundial akí tambe, Boneiru ta keda un lugá seif pa un i tur.
