Siman pasá Entidat Públiko Boneiru a organisá un brùnch na honor di e tim hubenil di beisbòl Bonaire-A, ku a logra un viktoria durante e 2026 PONY Caribbean Mustang 10U Zone Tournament.
E tim a marka historia pa medio di gana 2-1 kontra Venezuela, i ku esaki nan a establesé un tremendo prestashon pa Boneiru. E viktoria akí ta un fuente di orguyo pa henter nos isla i e ta mustra e talento, e disiplina i e dedikashon di nos deportistanan.
Durante e enkuentro e diputadonan Jennifer Mohamedjoenoes, Joselito Statia i Timoteo Silberie tabata presente pa personalmente felisitá e hungadónan i nan coachnan. Komo muestra di apresio, tur miembro di tim i tur coach a risibí un feneta den forma di bandera di Boneiru, komo rekonosementu pa nan trabou duru, nan perseveransia i nos ekselente representashon di Boneiru na nivel internashonal.
Entidat Públiko Boneiru ta ekspresá su orguyo tokante e prestashon akí i ta deseá e tim hopi éksito ku nan kompetensianan den futuro.
Boneiru ta orguyoso di boso.
