Ku satisfakshon Entidat Públiko Boneiru, Direktorado di Planifikashon i Desaroyo, ta wak bèk riba un reunion informativo tokante re-inskripshon di kapplug pa trabou na vegetashon den aña laboral 2026. E reunion a tuma lugá dia 18 di desèmber 2025 na Plasa Chiku Goeloe i e tabata bon bishitá di parti di tantu kapplugnan eksistente komo esunnan nobo.
Durante e reunion a duna splikashon tokante e sistema di traha nobo pa aña 2026. For di e aña akí ta kontratá e trabounan na vegetashon pa kada kuartal i ta repartí nan den e kuater distritonan di Boneiru. E aserkamentu akí ta sòru pa mas transparensia, mas klaridat den ehekushon i un kolaborashon profeshonal ku e kapplugnan lokal.
E kapplugnan ku tabata presente a haña splikashon tokante e prosedura di re-inskripshon, e eksigensianan mínimo i e espektativanan pa e aña laboral binidero. Tabatin espasio pa hasi pregunta, duna sugerensia, i tambe e posibilidat pa registrá mesora.
Segun Ligwino Leito, sekretario di direktorado suplente di Direktorado di Planifikashon i Desaroyo, kende a guia e reunion, re-inskripshon ta un paso importante: “Ku e
re-inskripshon akí konsientamente nos ta kuminsá kompletamente di nobo. Nos ta krea un sistema transparente ku ta brinda klaridat i ku ta aportá na mantenshon kualitativo na Boneiru.”
Entidat Públiko Boneiru ta enfatisá ku tur kapplug mester inskribí di nobo, tambe si den e añanan anterior nan tabata registrá kaba. Re-inskripshon ta posibel te ku 30 di desèmber 2025. Pa inskribí, por manda un email na directie_ro@bonairegov.com ku e siguiente dokumentonan:
- e formulario di inskripshon kompletamente yená; (disponibel riba https://bonairegov.com/pa/habitante/kapploeg)
- un ekstrakto (uittreksel) resien di Kámara di Komèrsio (no mas bieu ku 3 luna);
- un kopia di bo sédula;
- un plan di akshon (huntu ku lista di personal i material).
- referensia (si tin)
Ku e sistema nobo di traha akí, Entidat Públiko Boneiru ta pone un paso importante den direkshon di un mihó preparashon pa aña 2026 i un kolaborashon duradero i profeshonal ku e kapplugnan lokal.
Pa pregunta òf informashon adishonal, bo por manda un email na directie_ro@bonairegov.com ku komo tópiko: “Re-inskripshon di kapplug 2026”.
