Entidat públiko Boneiru ta ekspresá su apresio pa e manera ku nos komunidat i empresarionan a kontribuí na un Boneiru seif, aksesibel i ordená, pa medio di tene nan mes na regla. Danki na boso esfuerso nos espasio públiko a keda liber di opstákulo, loke ta importante pa nos peatonnan, nos tráfiko i nos servisionan di emergensia. Tambe den kaso di eventonan manera Black Friday, kaminda tin mas aktividat komersial i ta bira mas drùk, nos ta kontentu di mira ku empresarionan i doñonan di tienda kada biaha ta tene mas kuenta ku regulashon. Kumplimentu ku artíkulo 9 di e Ordenansa General di Polis (Algemene Politiekeur), kaminda tin pará ku no ta pèrmití pa bende merkansia, òf pone stènt, rèki i mesa riba kaminda públiko sin pèrmit, ta di gran importansia pa nos isla.
Dikon e reglanan akí ta importante
Pa medio di konhuntamente asumí nos responsabilidat i kumpli ku e reglanan, nos ta aportá na un ambiente di biba seif i plasentero pa tantu nos habitantenan komo nos bishitantenan. Espasio públiko ta di nos tur, i danki na boso koperashon esaki ta keda aksesibel i liber di opstákulo.
Kontròl i mantenshon di lei aktivo
Direktorado di Supervishon i Mantenshon di Lei ta sigui tene supervishon pa sòru ku tur hende ta kumpli ku regla. Nos ta gradisí e habitantenan i e empresarionan ku ya kaba a duna kontenido na esaki. Pa esunnan ku ainda tin pregunta tokante kiko sí i kiko no ta pèrmití, nos ta kla pa duna boso informashon i sosten.
Loke bo mester sa
- No ta pèrmití: Pa pone stènt, rèki, mesa òf otro material di benta riba kaminda públiko.
- Sí ta pèrmití: Pa tene akshon di benta den bo propio espasio di tienda òf riba tereno privá, basta ku esaki ta kumpli ku e regulashon vigente.
Un biaha mas danki
Nos ta apresiá dedikashon di nos komunidat enormemente i nos ta enkurashá tur hende pa sigui traha huntu pa un Boneiru seif i habitabel. Bo tin pregunta òf bo ke mas informashon tokante pèrmit i regulashon? E ora ei tuma kontakto ku Direktorado di Supervishon i Mantenshon di Lei via e number di telefòn 715-5330 durante ora di ofisina òf via email na directie_th@bonairegov.com.
