Miéntras Dia di Boneiru ta aserkando, Entidat Públiko Boneiru a kuminsá dekorá nos isla komo preparashon pa e selebrashon tan importante akí. Na diferente sitio a hisa bandera di Boneiru i pone otro dekorashon, inkluso riba e rotòndenan i den Kaya Grandi. Tur esaki pa engrandesé nos orguyo nashonal.
Lamentablemente nos mester konstatá ku a bai ku algun bandera i dekorashon sin outorisashon. Pa medio di esaki Entidat Públiko Boneiru ke enfatisá ku e dekorashonnan akí ta propiedat di Entidat Públiko Boneiru i ku kitamentu di dekorashon sin outorisashon no ta solamente un falta di rèspèt, pero e ta kastigabel tambe. E komportashon akí ta mina e esfuerso konhunto pa dekorá nos isla na un manera digno.
E tema di e aña akí, ‘Nos ta Boneiru’, ta sentral den e dekorashonnan akí. E lema akí ta simbolisá konektividat, i apresio i orguyo pa nos isla. Entidat Públiko Boneiru ta hasi un yamada riba tur hende pa huntu sòru pa un ambiente festivo i respetuoso. Gosa di e dekorashonnan, duna honor na nos bandera, i mustra rèspèt pa loke ta konektá nos komo boneriano.
Bo ta mira algu sospechoso òf bo ta ripará ku nan ta kita e dekorashonnan? E ora ei por fabor tuma kontakto ku nos via communicatie@bonairegov.com.
Masha danki pa bo koperashon. Laga nos selebrá Dia di Boneiru ku orguyo.
