Nombrashon di un direktiva nobo pa Fundashon Sentro Kultural Boneiru

Dia 6 di yüni 2025 gezaghèber di Boneiru a nombra un direktiva nobo pa Fundashon Sentro Kultural Boneiru – Stichting Cultureel Centrum Bonaire. E fundashon akí ku nan a lanta na aña 1968 ku komo meta pa promové bida kultural na nos isla, pa hopi tempu kaba no tabata aktivo.

Inaktividat i falta di registrashon formal

For di investigashon a resultá ku e fundashon te ku awe no ta inskribí den registro komersial di Kámara di Komèrsio. A resultá ku e inskripshon akí no ta posibel, pa motibu ku no tin dokumentu disponibel ku ta duna klaridat tokante e nombrashonnan i renunsia di miembronan di direktiva entre 1968 i 2023. Den práktika esaki ta nifiká ku no tabatin kestion mas di un direktiva hurídikamente bálido.

Base legal pa intervenshon di gezaghèber

E statutonan di e fundashon ta stipulá ku gezaghèber por nombra un direktiva nobo ora no tin un direktiva bálido mas. Pa e motibu akí, riba petishon di e personanan enbolbí, gezaghèber a hasi uso di e kompetensia akí i dia 6 di yüni 2025 a nombra un direktiva nobo.

Nombrashon a base di ekspertisio i independensia

Aunke no a stipulá profilnan formal di direktiva pa e fundashon, gezaghèber a skohe pa kandidatonan ku konosementu i eksperensia hurídiko i sosial. E miembronan nobo nombrá ta independiente i nan ta ehersé nan tarea dentro di e kuadronan di e statutonan eksistente.

Paso den direkshon di reedifikashon i resiliensia pa futuro

Ku e nombrashon akí a pone un paso importante den direkshon di registrashon formal di e fundashon na Kámara di Komèrsio. Gezaghèber a ekspresá e konfiansa ku e direktiva nobo por duna e organisashon un bida nobo. Den esaki tin atenshon spesial pa desaroyo di un struktura duradero di direktiva i realisashon di prosesonan interno segun e prinsipionan di Good Corporate Governance.

Impulso nobo pa kultura na Boneiru

Despues di su registrashon e fundashon por reanudá su tarea original atrobe aktivamente i un biaha mas e por ta di nifikashon pa Boneiru su desaroyo kultural. Finalmente gezaghèber a ekspresá e deseo ku lo bai atendé den un forma duradero ku Sentro di Bario Rincon ku ta propiedat di e fundashon.