Tur lus ta bèrdè awor: konstrukshon di e sala nobo pa deporte na Skol Amplio Papa Cornes ta ranka sali dentro di poko. Awor ku e último preparashon ta tras di lomba i a otorgá e pèrmitnan nesesario, dentro di algun dia ya kaba e promé skòp por bai den tera. Diputado Silberie ta aksentuá ku e proyekto akí ta forma parti di un invershon mas amplio den vários fasilidat di deporte i enseñansa na Boneiru.
Realisashon di e fasilidat akí na Skol Amplio Papa Cornes ta un deseo di hopi tempu kaba, ku awor ta bai bira realidat. Aweró e sala nobo pa deporte ta brinda e alumnonan un ambiente di deporte moderno, seif i bou di dak – esensial pa nan desaroyo, salú i bienestar físiko.
Diputado Silberie, kende ta enkargá ku enseñansa, ta ekspresá su entusiasmo tokante komienso di e trabou, ‘Pa mi ta un satisfakshon sumamente grandi, ku awor akí e proyekto akí debidamente ta bai ranka sali i ku e konstrukshon na Skol Amplio Papa Cornes ta kuminsá dentro di poko,’ segun Silberie. ‘Nos muchanan tin derecho riba fasilidat kualitativo di deporte pegá ku nan kas. Ku e proyekto akí nos ta mustra bon kla ku nos ta sigui invertí den e fasilidatnan ku ta nesesario pa un desaroyo salú i bon balansá di nos hóbennan na Boneiru.’
Bon notisia pa Rayo di Solo tambe
Banda di e inisio na Skol Amplio Papa Cornes, e diputado ta mèldu ku pa otro skolnan tambe tin progreso.‘Mi por partisipá tambe ku e preparashon pa e sala di deporte di Rayo di Solo tambe ta kasi kla. Nos ta trahando duru pa einan tambe riba término kòrtiku pone e siguiente paso, di manera ku mas mucha na nos isla por hasi deporte bou di sirkunstansianan optimal.’
Impakto direkto riba enseñansa
Debí ku nan ta haña nan propio sala di deporte, e skolnan no tin mester di bai otro lokalidat eksterno mas. Esaki ta sòru pa mas trankilidat den e roster di lès i pa deporte bira un parti integral di un dia di skol. E diseñonan ta sinkronisá spesífikamente ku nesesidat di e skolnan i e sirkunstansianan klimatológiko na nos isla, ku enfoke riba sostenibilidat i ventilashon natural.
Trabou riba término kòrtiku
Na Skol Amplio Papa Cornes e trabou di preparashon ta den pleno marcha. Durante e periodo di konstrukshon ta bai tin kontakto estrecho ku maneho di e skol i habitantenan di den bisindario pa garantisá siguridat.
