Keda konfrontá ku un embaraso no intenshoná por tin konsekuensia grandi pa hende. Si ya kaba tin problema, binida di un yu por empeorá e problemanan eksistente. For di 2 di yüni 2025 e programa ‘Nu Niet Zwanger’ (NNZ) a ranka sali ofisialmente na Boneiru. Ku un nòmber boneriano: Mi futuro, mi eskoho konsiente.
Kiko ta Mi futuro, mi eskoho konsiente
E promé 1000 dianan, ku ta kuminsá kaba tres luna promé ku e konsepshon te e di dos kumpleaño di un mucha, ta krusial pa un komienso prometedor. Mi futuro, mi eskoho konsiente (NNZ) ta un programa ku ta kontribuí na un komienso prometedor i ku Salubridat Públiko/GGD Boneiru ta kordiná. E programa ta un intervenshon rekonosé i nan ta ehekut’é den kasi tur munisipio na Hulanda. E ta un programa boluntario i e tin komo meta pa konsientisá dunadónan di ayudo i dunadónan di kuido tokante importansia di deliberashon tokante un deseo pa haña yu ku nan klientenan den e periodo ku nan por haña yu (hende muhé i hende hòmber). Di e manera ei nan por hasi un eskoho konsiente pa loke ta trata e momentu di nan deseo pa haña yu i nan por protehá nan mes adekuadamente si nan no tin un deseo pa haña yu ainda. Di manera ku nan no ta keda konfrontá ku un embaraso indeseá. Hendenan ku sí tin un deseo pa haña yu ta haña sosten den nan preparashon pa un embaraso salú.
Den diferente organisashon di ayudo, dunadónan di ayudo ta haña kapasitashon pa bira funshonario di atenshon. Nan ta haña kapasitashon den e metodologia di Mi futuro, mi eskoho konsiente (NNZ), kòmbersashon di motivashon i teoria di presensia. E metodologia di Mi futuro, mi eskoho konsiente (NNZ) ta un metodologia den kua huntu ku e kliente ta investigá kiko ta su deseonan rònt di planifikashon di famia i deseo pa haña yu i te kon leu esaki ta pas den e situashon aktual.
Mi futuro, mi eskoho konsiente (NNZ)–na Boneiru
Durante e lunanan tras di lomba nos a traha duru pa laga e programa kuadra pa e komienso na Boneiru. Na luna di febrüari di e aña akí komo preparashon nos a papia ku diferente organisashon di ayudo i partnernan médiko. Den luna di mei nos a duna kapasitashon na 27 profeshonal for di 7 organisashon. Akseso, entre otro trabou sosial, Guiami i JGZ, MHC, Fundashon Krusada, EOZ, Fundashon Rosa di Sharon, ZW-groep i un konsulta di dòkter di kas den e metodologia di NNZ. Di e grupo akí 14 partisipante ta bira funshonario di atenshon di Mi futuro, mi eskoho konsiente (NNZ), pa pone e metodologia akí bon riba agènda den e organisashon. E partisipantenan na e kapasitashonnan a bini ku e nòmber boneriano pa NNZ: Mi futuro, mi eskoho konsiente.
Mi futuro, mi eskoho konsiente ta forma parti di e programa Resiliensia Kai i Lanta den GGD Boneiru / Salubridat Públiko. Resiliensia ta un kolaborashon di GGD Boneiru, Akseso i MHC i ta enfoká riba e pilánan: salú seksual, salú mental i adikshon / supstansianan stimulante.
Kiko komienso di Mi futuro, mi eskoho konsiente (NNZ) ta nifiká?
For di 2 di yüni dunadónan di ayudo i dunadónan di kuido por akudí serka e tim di Mi futuro, mi eskoho konsiente (NNZ) di GGD Boneiru pa konseho i si ta nesesario nan por hasi petishon pa asistensia di e tim di Mi futuro, mi eskoho konsiente (NNZ) di GGD Boneiru pa sosten. Bo ke sa mas òf bo tin pregunta, e ora ei tuma kontakto ku e lider di proyekto di Mi futuro, mi eskoho konsiente (NNZ) Giramin Marchena via gmarch01@bonairegov.com.
