Na fin di aña 2024 Mesa di Klima Boneiru a organisá un kompetensia entre e skolnan boneriano pa pensa un lema inspirativo. Resientemente presidente di Mesa di Klima Boneiru a entregá un premio na grupo 8b di Skol Básiko ‘De Pelikaan’ pa motibu ku nan a bini ku e lema ganadó: “Our Island, Our Responsibility – Nos Isla, Nos Responsabilidat”.
Skolnan a haña rekompensa pa nan kreatividat i enbolbimentu
Aparte di Skol Básiko ‘De Pelikaan’, dos otro skol ku a partisipá, esta Skol Básiko ‘Aquamarin’ i Liseo Boneriano, tambe a risibí un premio komo rekonosementu pa nan dedikashon i kreatividat. A rekompensá tur tres skol ku palunan lokal. E premio simbóliko akí ta aksentuá importansia di palu pa nos komunidat i pa Boneiru su medio ambiente.
Importansia di palu pa un Boneiru sostenibel
Ku e akshon akí Mesa di Klima Boneiru ke trese importansia di palu bou di atenshon komo faktor esensial pa un isla mas sostenibel i mas habitabel. Palu ta kontribuí na produkshon di oksígeno, nan ta duna sombra, nan ta yuda tene suela pa esaki no laba bai, i nan ta yuda prevení eroshon. Banda di esaki blachi di palu ta mehorá fertilidat di suela.
Yamada pa akshon: planta i protehá palu
Ku e entrega di premio akí Mesa di Klima Boneiru ta spera di plama un mensahe fuerte: “Palu ta importante pa un Boneiru resiliente pa klima”. E organisashon ta enkurashá nos habitantenan pa planta i konservá palu komo un medida efektivo pa un isla mas habitabel. Esaki ta konektá perfektamente ku e mensahe general: un mihó Boneiru i un Boneiru mas sostenibel ta kuminsá serka nos mes.
Konsientisashon i responsabilidat
Mesa di Klima Boneiru ta orguyoso ku e partisipashon aktivo di e skolnan i ta spera ku e kompetensia akí ta kontribuí na un konsientisashon mas amplio tokante nesesidat di konservashon di naturalesa i tumamentu di responsabilidat pa nos isla. Huntu nos ta edifiká un futuro mas bèrdè i mas sostenibel pa Boneiru.
