Entidat Públiko Boneiru ta hasi un yamada riba habitante i bishitante pa no duna lora salbahe kuminda. Lora, konosí tambe komo ‘Amazona barbadensis’, ta un espesie di lora ku ya pa miles di aña ta bibando na Boneiru. Boneiru ta un di e último lugánan kaminda e espesie akí ta biba ainda den naturalesa.
Ounke e poblashon di lora a krese e último añanan, e espesie ta keda vulnerabel. Duna lora salbahe kuminda por tin konsekuensianan dañino. Paranan ku hende duna kuminda, por pèrdè nan miedu di hende. Konsekuentemente nan ta kore mas riesgo di haña aksidente ku outo, edifisio òf animalnan doméstiko. Tambe loranan yòn por bira dependiente di hende, na lugá di siña buska kuminda natural riba nan mes.
Ademas sitionan di duna kuminda por plama malesa, komo ku hopi para ta bin serka di otro. Kuminda ku hende ta duna, hopi bia no ta kontené e nutrientenan adekuado ku lora salbahe tin mester.
Segun ekspertonan e lora mas salú, ta un lora salbahe. E bestianan akí a adaptá nan mes na naturalesa di Boneiru i e mihó manera pa protehá nan ta di laga nan na pas.
Lora ta protehá pa legislashon lokal i internashonal. Ta prohibí pa stroba loranan salbahe, duna nan kuminda, kapturá, kumpra òf bende nan.
Lora ta un parti importante di e patrimonio natural i kultural di Boneiru. Tur hende por yuda, ora gosa di e paranan liber akí den naturalesa, sin duna nan kuminda òf kria nan komo animal doméstiko. Di e manera akí, huntu nos garantisá ku loranan di Boneiru por keda bula liber den futuro tambe.
