Boneiru tin 8 partisipante den e kompetensia literario di papiamentu di Arte di Palabra. E kompetensia di islanan ABC ta tuma lugá djárason 28 yüli 2021 na Aruba na Cas di Cultura. Públiko por presensia e obranan ku partisipantenan di Boneiru, Aruba i Kòrsou ta trese dilanti. Pa esnan ku no por ta presente, por sigui e evento pa medio di página di facebook di Arte di Palabra Boneiru. Boneiru lo kompetí ku diesun obra repartí bou di ocho partisipante. Boneiru tin representashon den tur kategoria, esta di poesia eksistente, poesia original, kuenta eksistente i kuenta original. Loke ta trata poesia i kuenta eksistente, partisipantenan lo deklamá poesia i kuenta eksistente di entre otro Pierre Lauffeur, Juan “Nòchi” Coffie i Giovani Gijsbertha. Shete di e partisipantenan ta outor di nan propio obra, esta poesia i kuenta original.
Via página di facebook Arte di Palabra Boneiru por sigui e kompetensia. Programa di transmishon ta planiá pa kuminsá ku antesala pa 5’or di atardi. E parti ofisial di e evento ta ranka sali mitar di seis di atardi. Pa 6’or lo inisiá ku e promé obranan den kategoria A.
Kategoria A ta e kategoria di Poesia eksistente. Den e kategoria aki Ramso Coffie lo trese un poesia eksistente di Pierre Lauffer titulá “Na final di kaminda” i Lygaira Pieters lo trese un poesia eksistente di Juan Nòchi Coffie titulá “Mi idioma”.
Den e kategoria B partisipantenan a krea nan propio obra, esta poesia original. Jeaniro Dorothea lo deklama “Sanashon interno”, Maria-Luisa Troncon “Bas den bo kas” i Ramso Coffie “Pensamentu di un hóben”.
Den e kategoria C di poesia original, Juriella Josephia ta trese su propio obra titulá “Tempu”, Irlenska Martinus “E spil” i Akeesha Cicilia “E yu di e mama soltera”.
Kategoria D ta kategoria di kuenta eksistente. Jeaniro Dorothea lo deklama “Wincho Buyado” skibí pa Giovanni Gijsbertha.
Kategoria E ta konsistí di kuenta orginal. Radinka Alberto lo representá Boneiru den e kategoria aki ku su obra titulá “Ban eksplorá Boneiru”.
Den kategoria E di kuenta original Juriella Josephia ta deleitá públiko ku propio obra titulá “E buki di aña”.
