A bestèl e vehíkulonan i segun espektativa nan ta keda entregá fin di òktober 2026. E trùknan nobo ta forma un paso importante den mehorashon struktural di rekohementu di sushi na Boneiru.
Diputado Dennis Martinus: “Ku e kuater trùknan di sushi akí nos por sigui mehorá rekohementu di sushi na Boneiru. Den e periodo tras di lomba ya kaba a pone diferente paso pa stabilisá e situashon na Selibon. Nos ta sigui traha riba esaki huntu ku Selibon, di manera ku nos habitantenan por konta ku rekohementu di sushi na un manera adekuá i konfiabel.”
Medida di emergensia pa stabilisá e situashon na Selibon
Den luna di febrüari ya kaba a kumpra dos trùk pa por atendé ku e problemanan di kapasidat di rekohementu. A invertí tambe den otro ekipo ku ta kore, piesa di reserva, i sosten pa mantenshon di e flota di vehíkulo. E invershon den e trùknan di sushi ta forma parti di un pakete mas grandi di medida di emergensia ku for di luna di aprel Kolegio Ehekutivo a bini kuné komo parti di e ‘last onder bestuursdwang’ pa stabilisá e situashon na Selibon i na lèntfel Lagun. Durante e ehekushon Kolegio Ehekutivo a pone medionan adishonal disponibel kaminda esaki tabata nesesario.
Aparte di e trùknan di sushi a invertí tambe den ekipo pisá, entre otro un ‘wheel loader’, un dòmtrùk, un ‘landfill compactor’ i un katapila. Ya kaba nan a entregá e ‘wheel loader’. Segun espektativa nan ta entregá e otro mashinnan den luna di òktober. Entidat Públiko Boneiru a pone medionan disponibel tambe pa limpiesa di e almasenamentu di tayer, pa un sistema nobo di traha na lèntfel i pa mehorashon di e posishon finansiero i operashonal di Selibon.
Entretantu resultado di e medidanan ta visibel kaba. E molèster direkto pa e bisindario, entre otro riesgo pa kandela, plaga i holó stinki, a bira ménos.
Futuro di rekohementu di sushi na Boneiru
Aktualmente un investigashon ta andando pa skohe e mihó sitio pa realisá un sentro nobo di transbordo i separashon multifunshonal. Awor ku gran parti di e medidanan di emergensia ta finalisá, e atenshon ta bai mas i mas riba un maneho di sushi struktural i duradero pa futuro di Boneiru.
