Krusero Mein Schiff 1 su promé bishita na Boneiru

E krusero Mein Schiff 1 ku ta nabegá bou di bandera Malta durante fin di siman a bishitá Boneiru pa promé bes.

E krusero Mein Schiff 1 ku ta nabegá bou di bandera Malta durante fin di siman a bishitá Boneiru pa promé bes. Mein Schiff 1 a yega Boneiru den oranan trempan di mainta ku un total di 1500 pasahero i 1100  tripulante. Sr. Günther Flanegin kapitan di haf a yama kapitan di e barku Omar Caruana i su tripulashon bon biní na Boneiru.
Cristopher Frans representando gezaghebber Rijna na nòmber di Entidat Públiko Boneiru a hasi entrega di bandera di Boneiru i a duna un splikashon amplio di nos bandera na kapitan Omar.

Kapitan di haf Günther Flanegin a entregá e kapitan un foto di e krusero momentu ku esaki tabata aserkando haf di Boneiru.
Derchlien Vrolijk kordinadó di merkadeo na ofisina di turismo TCB a regalá un buki di potrèt di Boneiru na kapitan Omar i Ruewen Leito di agensia Maduro Shipping a entregá un plaka den forma di Boneiru.

Kapitan Omar Caruana a keda agradesido na tur i komo muestra di apresio a entregá nan un rekuerdo di e barku. Den oranan di anochi e barku a sali ku destino St. Lucia, siguí pa Madeira i pa despues finalisá na Alemania.