Sekretario di Estado Alexandra van Huffelen huntu ku e kolegio ehekutivo di Boneiru a firma e akuerdo atministrativo Boneiru 2024-2027. Den e akuerdo atministrativo aki ta fiha e akuerdonan entre Boneiru i Reino. E akuerdo atministrativo ta forma e base pa un kolaborashon duradero di vários aña entre Boneiru i Reino. Den e akuerdo, kresementu kontrolá i desaroyo duradero di e isla ta pará sentral. Nan ta tradusí den tres pilar di kontenido: un sosiedat hustu, un aserkamentu integral di desaroyo duradero i gobernashon fuerte i demokrasia partisipativo.
Sosiedat hustu
Bou di e nòmber 'Traha riba Prosperidat i Bienestar', Boneiru i e ministerionan di SZW, OCW, VWS i BZK ta traha riba mas siguridat di bida pa abitantenan di Boneiru. Ku un entrada sufisiente i pronostikábel, un kas adekuá i pagabel i ménos preokupashon finansiero. Den futuro, si e abitantenan tin strès di debe, di pleno derecho nan mester por buska yudansa for di un sistema di yudansa di debe. Den e akuerdo e hubentut tambe ta pará sentral. Por ehèmpel, un 'pakete pa mucha' insular ta permití hóbennan, sin importá nan situashon familiar òf finansiero, partisipá den aktividatnan deportivo, artístiko i kultural. E meta ta pa e hóben por desaroyá su mes optimal i deskubrí su talento. Ademas a palabrá ku Reino lo bai eksplorá si ta posibel pa Hulanda Karibense tin un sistema pa mucha ku ta dependé di entrada.
Desaroyo duradero dor di kresementu kontrolá
E último añanan Boneiru a krese hopi rápido. Pa por bai ku e kresementu, kolegio ehekutivo ke pa Boneiru sigui krese den forma kontrolá den e añanan benidero. E kolegio ehekutivo i Reino a yega na un akuerdo pa hasi esaki basá riba e modelo di kresementu lento - e asina yamá ‘slow growth’ modèl - di ‘Wereldbank’. E ‘slow growth’ modèl ta un strategia pa desaroyo ekonómiko dirigí riba kresementu kontrolá i duradero na lugá di ekspanshon rápido. Ta usa e modèl pa evitá ku Boneiru ta krese muchu rápido, loke por kondusí na urbanisashon sin kontròl, problema di infrastruktura i daño na medioambiente. Ku introdukshon di un ordenansa di bibienda i di establesimentu di e entidat públiko Boneiru (OLB) por garantisá e kresementu kontrolá aki.
Promové Papiamentu
Ademas ta traha riba fortifikashon di e vínkulo sosioekonómiko i sosial di e abitantenan ku e isla. E idea di esaki ta pa e kultura di Boneiru ta visibel i rekonosibel, ku Papiamentu ta hunga un ròl sentral den sosiedat i e siudadano ta sinti su mes enbolbí den e isla i den e gobièrnu lokal. Pa promové Papiamentu, BZK ta pone 1 mion euro disponibel pa protehá i promové Papiamentu na Boneiru. Ku e plaka aki lo por ehekutá e akuerdonan for di e ‘Bestuursafspraak Papiamentu’. For di e supsidio liber pa Boneiru ta pone e fondonan na disposishon di e instituto di idioma Akademia Papiamentu.
Transporte públiko i mantenshon
Den kuadro di desaroyo duradero, den e akuerdo atministrativo ta duna prioridat na realisashon di transporte públiko, mehorashon di e sistema di pèrmit, supervishon i mantenshon (VTH), mehorashon di infrastruktura, i desaroyo integral di tereno. E intenshon ta pa for di aña 2025 e promé transporte públiko na Boneiru ta kore. Ademas, e kolegio ehekutivo i Reino lo sòru pa un desaroyo fuerte mas aleu di e sistema di pèrmit, supervishon i mantenshon, entre otro dor di hasi e sistemanan mas efektivo i efisiente.
Demokrasia fuerte i partisipativo
Den e akuerdo atministrativo tin hopi atenshon pa informá e abitantenan bon tokante di e maneho di e gobièrnu. Ademas ta traha riba un mihó yudansa legal pa e abitantenan di Boneiru. Pa mehorá kontakto ku siudadano i pa oumentá aksesibilidat di e servisionan, ta hasi esfuerso pa sigui ku digitalisashon. Pa e meta aki ta usa e agènda di trabou ‘Geactualiseerde Werkagenda Waardengedreven Digitaliseren 2024’, den kua ta traha pa fortifiká e sosiedat digital den e parti Karibense di Reino.
Fortifiká kapasidat di ehekushon
Pa por realisá e aserkamentu duradero, a hasi palabrashon tokante un kantidat di prinsipio importante. Di e manera aki, fortifikashon di e kapasidat di ehekushon ta un di e prioridatnan prinsipal di e kolegio ehekutivo di Boneiru. Esaki ta hopi nesesario tambe pa por ehekutá e palabrashonnan den e akuerdo. Esaki ta nifiká ku ta hasi un esfuerso fuerte pa fortifiká e kapasidat di maneho, e aparato gubernamental i e desaroyo mas aleu di e organisashon. Ademas Boneiru i Reino ta hasi esfuerso pa e abitantenan di e islanan ta ekivalente ku bista pa e posishon spesial di e isla.
Riba djamars 28 di mei sekretario di estado Alexandra van Huffelen i gezaghèber interino Nolly Oleana a firma e akuerdo atministrativo.
Klek aki pa lesa e Akuerdo di gobernashon 2024 - 2027
