Resientemente, diputado Timoteo Silberie i Tizania Rooi (konsehero di maneho di Direktorado di Komunidat i Kuido di Entidat Públiko Boneiru), a partisipá na e Family Justice Center Capitol Hill Days & Leadership Summit na Washington D.C. Durante e enkuentro internashonal akí, a interkambiá konosementu tokante e maneho di violensia doméstiko, maltrato di mucha, maltrato di hende grandi i otro forma di violensia den famia.
E konosementu atkirí durante e enkuentro akí ta kuadra bon ku e proseso pa sigui traha pa funda un Family Justice Center (FJC) na Boneiru. Djamars 9 di yüni 2026, tabatin un enkuentro pa huntu ku e partnernan di kadena kuminsá traha na kon duna FJC forma den futuro.
Tabatin representante di KPCN, Guiami, Akseso, Zorg- en Veiligheidshuis, Krusada, Tabitha, Reclassering, Mental Health Caribbean (MHC) i Voogdijraad.
Durante e reunion a papia tokante:
- maneho konhunto di violensia doméstiko, maltrato di mucha i maltrato di hende grandi;
- kolaborashon entre diferente organisashon;
- preparashon di un akuerdo di kolaborashon;
- tur servicio i sosten ku e partnernan por ofresé for di FJC.
Family Justice Center lo bira un lugá sigur i aksesibel kaminda habitante por bai pa haña yudansa, protekshon i guia. Reuniendo diferente organisashon na e mes lokalidat, víktima i famia lo por risibí yudansa ku ta mihó i mas lihé.
“Nos no ta trahando solamente na un edifisio, sino prinsipalmente na un relashon di kolaborashon duradero kaminda duna yudansa, kuido i seguridat ta fortalesé otro. Finalisashon di Family Justice Center ta aserkando. Den e periodo ku ta bin, nos lo informá komunidat aktivamente tokante tur loke e sentro ta brinda i tokante importansia di señalamentu na tempu i sosten den kaso di violensia doméstiko i otro forma di abuso,” asina diputado Timoteo Silberie a deklará .
