E Grupo di Trabou Dia di Emansipashon / Konmemorashon Abolishon di Sklabitut den estrecho koperashon ku Herdenkingscomité slavernijverleden i NGO platform ta organisá un anochi di konmemorashon i selebrashon na Plaza Wilhemina riba djamars 1 di yüli 2025. E tema fuerte di e anochi akí ta: ‘Ban Selebrá Libertat’.
Dikon nos ta selebrá libertat
Libertat ta un logro grandi. No ta trata di algu natural, pero di resultado di lucha, perseveransia i sakrifisio di hendenan ku a bai nos dilanti. Pa e motibu akí ta importante pa huntu nos para ketu na abolishon di sklabitut i selebrá nos libertat.
Loke tin riba programa
E selebrashon ta tuma lugá entre 17:00 or i 21:00 or. A skohe konsientemente pa e orario akí, di manera ku hendenan ku ta traha i muchanan i hóbennan ku ta bai skol tambe por partisipá.
E programa ta konsistí di:
- Un parti ofisial ku diskurso i ponementu di krans
- Un programa kultural festivo ku músika, baile i vários presentashon
Konmemorá i konektá huntu
Durante e anochi nos no ta para ketu solamente na pasado, pero tin atenshon tambe pa konekshon, ekspreshon i sentido komunitario. Nos ta selebrá ken nos ta i kiko nos a logra huntu.
Henter luna di yüli ta den signo di libertat
Na kaminda pa 1 di yüli, pero despues di e fecha ei tambe, nos ta organisá diferente aktividat. Vários organisashon den komunidat boneriano ta ehekutá esakinan. Meta di e aktividatnan akí ta pa stimulá konsientisashon, edukashon i selebrashon di libertat.
Dentro di poko ta sali un kalènder apart ku e programa kompleto di e Luna di Libertat.
Bin i partisipá
Tur hende na Boneiru ta kordialmente invitá pa partisipá na e anochi spesial akí. Laga nos huntu konmemorá, selebrá i edifiká un futuro ku konektividat, rèspèt i ekivalensia.
Bo presensia ta hasi e diferensia!
