Durante un konferensia di trabou di tres dia di e Grupo di Proyekto di Mesa di Klima Boneiru, empleadonan públiko di Entidat Públiko Boneiru i di ministerionan i instansianan di Maneho di Awa hulandes a traha konhuntamente riba elaborashon mas aleu di e plan di klima pa nos isla. Yuda tradusí e Intenshon di Klima Boneiru 2025 den akshonnan konkreto riba tèrmino kòrtiku i largu tabata sentral den esaki.
Clark Abraham a habri e konferensia i el a enfatisá ku kambio di klima no ta un problema apstrakto òf un problema di futuro pa Boneiru, pero un realidat visibel i riparabel. El a mustra riba e konsekuensianan pa entre otro áreanan na kosta, sistemanan ekológiko i habitabilidat di nos barionan, i el a aksentuá ku para ketu no ta un opshon. Segun e diputado e problema di klima ta rekerí eskohonan skèrpi, responsabilidat atministrativo i kolaborashon estrecho entre nos gobièrnu lokal i gobièrnu hulandes, ku bista pa e konteksto spesífiko di Boneiru.
For di Entidat Públiko Boneiru, e direktoradonan di Planifikashon i Desaroyo, Supervishon i Mantenshon di Lei, Komunidat i Kuido i GGD a partisipá na e konferensia di trabou. For di Hulanda Oropeo tabata presente empleadonan públiko di e ministerionan di Infrastruktura i Maneho di Awa, Agrikultura, Piskamentu, Siguridat di Kuminda i Naturalesa, Asuntunan Interno i Relashonnan den Reino i di e instansianan di Maneho di Awa ‘Rijn en IJssel’ i ‘Friesland’. E konferensia a brinda un oportunidat úniko pa empleadonan públiko pa entre nan mes i den un forma interdepartamental bai den kòmbersashon tokante un tema amplio ku ta surpasá e área i ku ta afektá komunidat boneriano riba tur tereno.
Banda di resultadonan a base di kontenido, e konferensia di trabou a kontribuí tambe na mas komprenshon mutuo entre e organisashonnan enbolbí. Pa medio di e programa konhunto i intensivo a surgi mas konosementu di e ròlnan, responsabilidatnan, dilemanan i sistemanan di traha di e partisipantenan. Ku esaki nan a pone un bon base pa kolaborashon mas aleu entre Entidat Públiko Boneiru i e ministerionan hulandes na momentu di ehekushon di e maneho di klima na Boneiru.
E programa a konsistí di enkuentronan plenario i seshonnan di trabou interaktivo, komplementá ku kontribushonnan di oradornan invitá for di den nos region i for di Hulanda. E alkalde di klima di Rotterdam, sr. Nick Zuiddam a papia tokante ‘community building’ i enbolbimentu di habitantenan ku problemátikanan di klima. Sr. Jonathan Jukema (Kòrsou) a tira lus riba e relashon entre patrimonio, entre otro monumentunan, i kambio di klima. For di Aruba sr. Rendell de Kort a dediká atenshon na e problema di siguridat di kuminda i vulnerabilidat di nos islanan den un klima ku ta kambiando.
Resultado di e konferensia di trabou ta e kontribushon na elaborashon di un lista prioritario di akshon pa kada área di maneho. E resultadonan ta forma un komponente direkto pa edifikashon di e Plan di Klima Boneiru 2026, ku aktualmente nan ta desaroyando den forma paralelo. Segun espektativa na fin di luna di mart nan ta entregá e Plan di Klima.
Ku satisfakshon, e presidente di Mesa di Klima Boneiru, sr Nolly Oleana, ta wak wèk riba e konferensia. Segun Oleana e kombinashon di konosementu lokal, kolaborashon atministrativo i ekspertisio eksterno a kondusí na input balioso i konkreto. ‘Loke nos a logra akí, ta bira un parti integral di e Plan di Klima. Nos ta pone un paso importante den direkshon di un Boneiru sostenibel i habitabel,’ segun Nolly Oleana. Segun espektativa na fin di luna di mart nan ta entregá e Plan di Klima.
