Entidat Públiko Boneiru ta ranka sali ku desaroyo di e ‘Structuurvisie Boneiru 2025’ (Vishon Struktural 2025): un plan pa futuro den kua huntu nos ta determiná kon nos isla por sigui desaroyá su mes na un manera sostenibel, ekilibrá i bunita. Nos ta invitá kada boneriano pa yuda pensa tokante kon Boneiru mester lusi na aña 2050. Pa medio di un enkuesta kòrtiku di solamente 10 pregunta, tur hende por duna nan opinion tokante temanan importante manera biba, naturalesa, tráfiko, fasilidatnan, klima i turismo. Por haña e enkuesta via e lenk aki.
Banda di esaki e tim di proyekto BVR, den kolaborashon ku Entidat Públiko Boneiru, ta organisá un seri di enkuentro pa tende e ideanan i preokupashonnan di nos habitantenan. Nos ke skucha bo opinion! Tur habitante ta invitá pa partisipá na un di e seshonnan akí i duna bo opinion tokante futuro di Boneiru.
Presentashonnan:
- 16 di òktober 2025 | Cocari, Rincon | 19.00 - 21.00
- 20 di òktober 2025 | ABVO, Kralendijk | 19.00 - 21.00
- 22 di òktober 2025 | Biblioteka Públiko Boneiru, Kralendijk | 18.30 - 20.30
Momentonan liber pa pasa i hasi pregunta tokante e proyekto:
- 17 di òktober | Cocari, Rincon | 13.00 - 17.00
- 21 di òktober | ABVO, Kralendijk | 13.00 - 17.00
Boneiru ta konfrontrando desafionan grandi. Den e 10 añanan tras di lomba, e kantidat di habitante a bira kasi dòbel. Pa e motibu akí awor a bira tempu pa wak padilanti: kon nos ke pa Boneiru sigui desaroyá su mes? E ‘Structuurvisie Boneiru 2050’ ta forma e kuadro teritorial pa por plania nos espasio i ambiente. Preguntanan importante ta entre otro:
- Kua ta e áreanan di naturalesa i sistemanan di desagwe ku nos tin ku protehá?
- Na unda por konstruí na un manera responsabel, i na unda nò?
- Kon nos ta sòru pa kada bario ta disponé di e fasilidatnan adekuá?
- Kon nos ta repartí aktividatnan ekonómiko mas mihó atraves di nos isla?
- Kiko nos ke pa nos bishitantenan konta tokante Boneiru ora nan regresá nan kas?
Entidat Públiko Boneiru ke pa tur hende sinti nan mes skuchá den e proseso akí. Aparte di habitantenan nos ta invitá organisashonnan i empresanan tambe pa kompartí nan vishon. Bo ta forma parti di un organisashon ku nos no a aserká ainda? E ora ei tuma kontakto via communicatie@bonairegov.com.
Huntu nos ta edifiká un vishon ku ta duna balor na nos identidat, nos naturalesa, nos kultura i nos futuro. Partisipá, yuda pensa, i yuda duna forma na e Boneiru di 2050.
