Entidat Públiko Boneiru ta ofresé atrobe e posibilidat pa mayornan i tutornan pidi un kompensashon pa artíkulo di skol i unifòrm di skol pa muchanan di skol básiko. Ademas tin un kompensashon disponibel pa gastu di buki pa studiantenan menor di edat di mbo. Studiantenan di mbo mayor di edat nan mes por pidi e kompensashon akí.
Via skolnan i ya na mei, a informá mayornan i tutornan ku ta kontinuá ku e proyekto i ku nan por entregá un petishon pa e kompensashon.
Pa un alumno di skol básiko, e kompensashon ta 300 dòler pa mucha. Pa studiantenan di mbo tin un kompensashon disponibel di maksimalmente 400 dòler pa buki di estudio. E montante final ta dependé di e estudio. A oumentá e límitenan di entrada pa e petishonnan akí.
Por hasi e petishon pa e kompensashon pa artíkulo di skol, unifòrm di skol i gastu di buki solamente online via www.bonairegov.com/back2school. Riba e wèpsait akí tin e kondishonnan i un lista di e dokumentonan nesesario pa e petishon.
Ta importante pa ora hasi petishon mesora manda tur e dokumentonan ku ta pidi. Si falta dokumento, mester tuma kontakto promé ku esun ku ta hasi petishon. Por sigui ku e tratamentu solamente ora risibí tur dokumento nesesario. Esaki por kondusí na retraso.
Mayornan, tutornan i studiantenan mayor di edat di mbo ku mester di yudansa pa yena e petishon online, por haña asistensia. Durante yüli i ougùstùs, di djaluna te ku djaweps, tin yudansa disponibel via telefòn òf WhatsApp na (+599) 701 1055, di 09.00 te 12.00 i di 14.00 te 16.00. Por manda pregunta tambe na schoolbenodigdheden@bonairegov.com.
Entidat Públiko Boneiru ta konsehá mayornan, tutornan i studiantenan di mbo pa entregá e petishon mas pronto posibel i no warda te ora e aña eskolar nobo kuminsá. Ta trata un petishon kompleto, ku tur dokumento nesesario, dentro di mas o ménos seis siman.
