Kolegio Ehekutivo a tuma un paso importante pa funda un Ofisina di Derecho di Siudadano. Un nota inisial (Startnotitie) a keda presentá na Konseho Insular pa evaluashon. Ku e paso akí, e gobièrnu lokal ke fortifiká posishon legal di nos siudadanonan i mehorá nan aksesibilidat na sosten legal i asuntunan atministrativo.
E Ofisina di Derecho di Siudadano lo ta un instansia independiente ku ta duna yudansa grátis na siudadano. E por inkluí asistensia ku preguntanan legal, entregá keho, presentá opheshon òf si ta nesesario, hasta apelá kontra desishonnan tumá pa instansianan di gobièrnu òf otro organisashonnan ku ta ehersé un funshon públiko.
Ta trata di instansianan manera ZJCN (seguro di salú), IND (Imigrashon i Naturalisashon), hòspital, Servisio di Impuesto (Belastingdienst), gobièrnu lokal, i e kompanianan di gobièrnu WEB, SELIBON i BIA.
“Un sosiedat hustu ta eksigí ku tur hende tin akseso na nan derecho. Esei no mester dependé di nan kapasidat finansiero. Pa e motibu ei, nos komo Kolegio Ehekutivo ke kontribuí na duna sosten na nos siudadanonan pa por rekuperá nan derecho, inkluso kontra gobièrnu di Boneiru,”. segun diputado Clark Abraham
Kolegio Ehekutivo ta enfatisá ku tur habitante di Boneiru mester tin akseso igual na protekshon legal. Desaroyo di e ofisina lo tuma lugá den kolaborashon estrecho ku gobièrnu di Reino i Ombudsman Nashonal, pa yega na un lokèt ku ta kuidadosamente organisá i bon sinkronisá i ku realmente ta sirbi nos komunidat.
