Dia 30 di ougùstùs entidat públiko Boneiru durante un reunion di Kolegio Ehekutivo a stipulá e diseño di presupuesto 2024, i dia 1 di sèptèmber próksimo ta present’é na Konseho Insular pa aprobashon. E prosedimentu akí un biaha mas ta konsekuensia di e pasonan importante ku entidat públiko Boneiru a pone durante e añanan tras di lomba den direkshon di un maneho finansiero duradero.
E diseño di presupuesto ta un presupuesto di mas aña, di manera ku e konsekuensianan finansiero di e maneho aspirá i efekto di e invershonnan ta visibel atraves di vários aña. E diseño di presupuesto ta balansá pa aña 2024 i pa e añanan 2025 te ku 2027 i ta suma US$ 88 mion.
E diseño di presupuesto ta sigui e liñanan grandi di e akuerdo di koalishon ‘Huntu ku kurason pa hende’. Banda di ehekushon di e tareanan regular, Kolegio Ehekutivo ta pone énfasis riba kombatimentu di pobresa pa medio di redukshon di kosto di bida ku transporte públiko, mehorashon di infrastruktura, eliminashon di mantenshon atrasá di kaminda, duna atenshon na maneho di awa i sòru pa disponibilidat di bibienda pagabel. Banda di esaki e Departamento di Agrikultura, Krio di Bestia i Peska (LVV) lo konstruí infrastruktura manera stal pa bestia i hal di sombra (greenhouse), ku kunukeronan por hür, pa di e manera akí oumentá produkshon lokal di kuminda. Mas aleu a inkluí espasio den e diseño di presupuesto pa inovashon atministrativo i fortifikashon di forsa di ehekushon.
Anteriormente dia 10 di ougùstùs a presentá e diseño di presupuesto na Kolegio di Supervishon Finansiero (CFT), ku a emití un konseho tokante esaki. Meimei di luna di óktober a plania un reunion di Konseho Insular, kaminda Konseho Insular lo tuma un desishon tokante e diseño di presupuesto. Manera e último añanan ta kustumber, e aña akí tambe a base di e diseño di presupuesto a traha un ‘presupuesto den un solo bista’. Ta publiká esaki na mes momentu ku e diseño di presupuesto riba wèpsait di entidat públiko Boneiru (www.bonairegov.com), despues di su presentashon na Konseho Insular.
