For di aña 2019 ku rason habitantenan di Kaya Gurubu ta pidi atenshon pa e estado di mantenshon atrasá di nan kaya. E gobièrnu aktual, ku resientemente a asumí funshon, ta rekonosé e retraso den mantenshon di infrastruktura i ta trahando riba un plan di akshon pa atende ku esaki.
Resientemente e diputadonan Anjelica Cicilia i Nina den Heyer personalmente a hasi un bishita na Kaya Gurubu i a papia ku un di e habitantenan.
‘Nos ta rekonosé ku tin un retraso supstansial pa loke ta trata mantenshon i mehorashon di nos infrastruktura, i nos ta desidido pa trese kambio den esaki,’ segun diputado Anjelica Cicilia. ‘Aktualmente nos ta kompilando un lista di kaya ku tin mester di atenshon èkstra riba término kòrtiku. Nos ta bai traha riba mehorashon di nos infrastruktura i pues indirektamente riba nos ambiente di biba tambe.’
E Kolegio Ehekutivo aki ta realisá su mes ku no tin tempu pa pèrdè i ta trahando duru riba formulashon di un lista di prioridat. Ta komprendibel ku frustrashon ta grandi serka habitantenan, pero e diputadonan ta sigurá ku ta tumando akshon pa atendé ku e problemanan i trese kambio.
E diputadonan ta enkurashá habitantenan pa keda enbolbí i nan lo komuniká den un forma transparente tokante progreso di e plan di akshon. Dentro di poko ta bini un punto di notifikashon ofisial, kaminda habitantenan por komuniká direktamente ku gobièrnu tokante mantenshon atrasá na nos infrastruktura. ‘Esaki ta un esfuerso konhunto pa mehorá e infrastruktura, i nos ta invitá nos komunidat pa traha huntu ku nos riba un mihó ambiente di biba ku nos tur por ta orguyoso di dje.’
