Na nòmber di e Kolegio Ehekutivo di Boneiru, Direktorado di Supervishon i Mantenshon di Lei a manda un karta pa Servisio di Limpiesa Boneiru (SELIBON) ku nan tin te ku 1 di sèptèmber 2025 pa optené e pèrmitnan nesesario pa nan aktividatnan na Lèntfel Lagun. Si SELIBON no hasi esaki, Direktorado di Supervishon i Mantenshon di Lei lo tuma medidanan administrativo adishonal, kaminda no ta deskartá ku mester para tur aktividat na lèntfel.
Dia 28 di febrüari 2025, Direktorado di Supervishon i Mantenshon di Lei a informá SELIBON ku nan aktividatnan na Lèntfel Lagun dentro di un término mas kòrtiku posibel, pero pa mas tardá promé ku 1 di sèptèmber, mester kumpli ku tur stipulashon legal i ku nan mester disponé di e pèrmitnan nesesario.
Inkumplimentu
E lèntfel na Lagun, ku SELIBON ta manehá, pa hopi aña kaba no ta disponé di e pèrmitanan rekerí, ni pa e lugá di depositá shushi, ni pa e lugá pa almasená zeta bieu, miéntras ku e aktividatnan akí ta sigui tuma lugá sí. Kolegio Ehekutivo ta urgi SELIBON pa koregí e situashon ilegal akí mas rápido posibel.
Término
Pa algun di e pèrmitnan rekerí, un estudio di Impacto Ambiental (MER-onderzoek) ta nesesario. E estudio aki, ku instansianan rekonosí ta ehekutá, generalmente ta dura vários luna. Pa e motibu akí, un término mas kòrtiku posibel, pero rasonabel, ta nesesario pa garantisá ku por kumpli ku tur eksigensia legal.
Supervision Intensivo
Durante e período indiká, Direktorado di Supervishon i Mantenshon di Lei lo intensifiká e supervishon riba Lèntfel Lagun, pa sòru ku ta kumpli ku e preskripshonnan legal.
Anulashon di e tumamentu di tarea over (Indeplaatsstelling)
Dia 15 di novèmber último, Representante di Reino a imponé un tumamentu di tarea over, e asina yamá ‘Indeplaatsstelling’, riba Kolegio Ehekutivo tokante ‘Permiso, Supervishon i Mantenshon di Lei na Lèntfel Lagun’, ku a resultá den traspaso temporal di e kompetensianan pa tuma e medidanan menshoná akí riba pa e Representante di Reino.
Sinembargo, durante e periodo di tumamentu di tarea over, o sea e ‘Indeplaatstelling’, e Representante di Reino no a tuma ningun medida pa restablesé e defisiensianan eksistente menshoná akí riba, loke a kondusí na retraso signifikante.
Ku e veredikto resien di hues pa anulá e tumamentu over di tarea (Indeplaatsstelling), e kompetensianan a bini bèk serka Kolegio Ehekutivo. Di e manera akí sin ningun opstrukshon por kontinuá ku e trayektonan di mantenshon di lei ku a kuminsá anteriormente kuné i awor ta tumando e pasonan nesesario pa atendé na un manera desidido ku e problemanan na Lèntfel Lagun.
