Kolegio Ehekutivo di Boneiru ta bati alarma tokante kriminalidat i mantenshon di lei

Pa medio di un karta Kolegio Ehekutivo di Entidat Públiko Boneiru a pone Minister di Hustisia i Siguridat na altura di su preokupashon serio tokante e kriminalidat ku ta oumentando i e defisiensianan struktural pa loke ta trata mantenshon di lei na nos isla. E karta ta motibu pa un súplika urgente na Gobièrnu di Reino pa mesora tuma medida struktural.

Kriminalidat na Boneiru ta mustra un oumento preokupante, en partikular ora ta trata di krímen violento kaminda nan ta hasi uso di arma (di kandela). E análisis resien di imágen di kriminalidat di Kuerpo Polisial Hulanda Karibense (KPCN) i e rapòrt Staat van de rechtshandhaving Caribisch Nederland 2024 – Estado di mantenshon di lei Hulanda Karibense 2024 ta konfirmá e imágen akí. E Konseho pa Mantenshon di Lei (Raad voor de Rechtshandhaving) ta papia di un situashon ‘sumamente preokupante’, tambe pa motibu di e falta struktural di personal na polis, Koninklijke Marechaussee (KMar) i Instituto Hudisial Hulanda Karibense (Justitiële Inrichting Caribisch Nederland – JICN).

Skarsedat di kapasidat i trato desigual

Konseho Ehekutivo ta bisa ku mantenshon di òrden públiko i siguridat ta na peliger pa motibu ku servisionan esensial ta konfrontá skarsedat króniko di personal. Nan ta sinti falta tambe di maneho integral, akshon ku enfoke riba informashon i kolaborashon entre e servisionan. Banda di esaki tin kestion di un desigualdat kresiente den kondishonnan laboral. Pa e mesun trabou, empleadonan uniformá lokal ta gana strukturalmente ménos ku koleganan kontratá temporalmente for di Hulanda Oropeo. Esaki ta mina nan moral i ta kondusí na un situashon kaminda e personal ta bandoná servisio.

No tin vishon nobo, pero falta di akshon sí tin

‘Pa hopi aña kaba e problemanan akí ta konosé serka e ministerionan di Hustisia i Siguridat i di Asuntunan Interno, serka Representante di Reino i den e konsulta di triángulo. Tòg nan no ta tuma medida struktural. No ta pa motibu di falta di konosementu, pero di determinashon gubernamental atministrativo’, segun Kolegio Ehekutivo.

Yamada na Minister di Hustisio i Siguridat

Den e karta ku nan a manda, Kolegio Ehekutivo ta hasi un yamada na Minister di Hustisia i Siguridat pa:

• realisá fortifikashon struktural di polis, marechaussee i e instituto hudisial;
• eliminá e trato desigual di personal lokal;
• mehorá e kolaborashon entre e servisionan pa medio di dunamentu di guia na un manera integral i traha den un forma kaminda ta eliminá separashon i fomentá integrashon.

Kolegio Ehekutivo ta konta ku un reakshon konkreto di parti di Reino dentro di dos luna.

Nota pa redakshon:

Pa mas informashon òf petishon pa entrevista bo por tuma kontakto ku departamento di Komunikashon di Entidat Públiko Boneiru via e number di telefòn +599 717 5330.