PSV i Boneiru a kuminsá ku un kolaborashon nobo. E próksimo dos aña e klup i nos isla lo traha huntu rònt di diferente tema sosial i ekonómiko. Banda di esaki tin atenshon pa desaroyo di deporte na nos isla, ku un enfoke spesial riba futbòl femenino, pero tambe ku atenshon permanente pa desaroyo di talento maskulino.
Na aña 2022-2023 ya kaba PSV i Boneiru a uni forsa. Awor akí nan ta duna bida nobo na e kolaborashon. E meta di e tempu ei tabata pa fortifiká e laso entre Boneiru i e region di Brainport. Entre tantu a establesé e konekshon ei eksitosamente, i ta tempu pues pa un siguienta paso. Ku e prolongashon ta bini atenshon enfátiko pa impakto sosial i desaroyo mas aleu di talento di futbòl na nos isla.
Un parti di e kolaborashon renobá ta entre otro un bishita di selekshon di futbòl di Boneiru na PSV Campus De Herdgang. Banda di esaki un biaha mas PSV ta organisá un siman di futbòl na Boneiru, bou di guia di entrenadónan di PSV Soccer School. Esaki ta enfoká riba tantu mucha hòmber komo mucha muhé, di manera ku tur talento por sigui desaroyá mas aleu.
Algu ku ta nobo den e kolaborashon ta e énfasis riba futbòl femenino. Tantu PSV komo Boneiru ta rekonosé e potensial di futbòl femenino i via inisiativanan konhunto nan ke kontribuí na kresementu di e deporte akí na nos isla.
Laso duradero entre nos isla i PSV
Banda di kolaborashon deportivo e konekshon ekonómiko tambe ta keda importante. Un biaha mas tin un mishon komersial pa e region di Brainport planiá, kaminda empresarionan boneriano por drenta den kontakto ku empresanan den e region ei.
E direktor komersial Frans Janssen ta orguyoso ku PSV ta kontribuí na desaroyo di e isla karibense. ‘Nos ta mira esaki komo un responsabilidat i un oportunidat pa kontribuí na desaroyo sosial i deportivo na Boneiru. E ampliashon den direkshon di futbòl femenino ta konektá perfektamente ku e balornan di PSV. Huntu nos ta hasi futbòl mas ekstenso i mas fuerte.’
‘Nos ta kontentu ku un biaha mas nos por sera un akuerdo di kolaborashon ku PSV. E kolaborashon akí ta duna un aporte balioso na promoshon di deporte, edukashon i desaroyo sosial ekonómiko na Boneiru – metanan ku ta pertenesé na e prioridatnan di e aktual programa di gobernashon’, segun diputado Peter Silberie.
Ku e fase nobo akí PSV i Boneiru ta suprayá nan ambishon kompartí: un kolaborashon duradero i signifikativo, kaminda futbòl, edukashon i progreso sosial i ekonómiko ta kana man den man.
