Manera diputado Hennyson Thielman a duna di konosé na okashon di presentashon di e di tres fase di e proyekto pa renobá Kaya Korona, trabounan ta sigui pa drecha otro kayanan riba nos isla. En konekshon ku esaki entrante djaluna, di Ougùstùs 2023, lo sera Kaya Isla Ariba, for di e entrada na Malekon (Kaya Jan N.E. Craane) te na e krusada ku Kaya Grandi, kompletamente pa tur tráfiko, asina diputado Thielman, enkargá ku entre otro Desaroyo di tereno i Tráfiko i Transporte ta anunsiá.
Kaya Grandi
E trabounan ta kuminsá ku kibramentu di Kaya Isla Ariba kompleto te na e krusada ku Kaya Grandi. Lo trata pa e trabounan akí trese ménos molèster posibel pa komersiante- i usuarionan di Kaya grandi. Pa e motibu akí, miéntras ku e trabounan akí ta tumando lugá, Kaya Grandi lo keda aksesibel pa tráfiko.
Na momentu ku yega turno pa drecha e krusada di Kaya Isla Ariba i Kaya Grandi si lo ta nesesario pa sera e parti di Kaya Grandi den direkshon di e nogoshi di Luciano’s pa tres siman. Esei ta enserá ku durante e tres simannan ei e parti akí di Kaya Grandi lo no ta aksesibel pa tráfiko. Lo anunsiá esaki na tempu. Despues di tres siman lo habri Kaya Grandi atrobe pa tur tráfiko.
Segun plan e trabounan ta dura entre komienso di ougùstùs te òktober 2023. Durante ku e trabounan ta tumando lugá lo señalá rutanan di desviashon ku bòrchi. Diputado Thielman ta bisa di ta konsiente ku e trabounan akí lo trese inkombeniensianan kuné i ta pidi diskulpa i komprenshon pa e situashon.
