Kralendijk - For di 8 di aprel 2021 biaheronan for di Amérika Latino i e otro paisnan ku tin un prohibishon di buelo pa Boneiru, ta bai 10 dia den karentena sentral riba propio gastu ora nan yega nos isla. Esei ta sosodé na lugánan sentral ku gezaghèber Edison Rijna a apuntá. Muchanan te 13 aña ku ta biaha huntu ku adulto, tambe mester bai den karentena. Sinku dia despues di yegada, biaheronan den karentena por hasi un tèst di PCR riba propio gastu, muchanan te 13 aña no tin nodi di hasi esei. Mester manda e resultado di tèst pa e departamento di Salubridat Públiko. Den kaso di un resultado di tèst negativo, e biaheronan i muchanan te 13 aña por sali for di karentena.
Ta bai pa pasaheronan for di Argentina, Bolivia, Brasil, Chile, Colombia, Repúblika Dominikano, Ecuador, Guyana Franses, Guyana, Panamá, Paraguay, Perú, Sürnam, Uruguay, Venezuela, Reino Uní i Suráfrika. Na Amérika Latino tin chèns mas grandi pa e tipo brasileño di e vírùs di corona. Ku e tèst di PCR obligatorio sinku dia despues di yegada, Boneiru ke prevení ku e tipo brasileño di e vírùs por plama na e isla.
Pa un tempu kaba tabatin un prohibishon di buelo pa buelo direkto for di e paisnan ku ta menshoná aki riba. E tèst(nan) obligatorio promé ku salida pa e pasaheronan akí ta keda na vigor. Promé ku salida pa Boneiru, tur pasahero di 13 aña i ariba mester tin un tèst negativo di PCR/NAAT, mester hasi e tèst maksimalmente 24 ora promé ku salida. Un otro posibilidat ta un tèst negativo di PCR ku a hasi maksimalmente 72 ora promé ku yegada kombiná ku resultado negativo di un tèst antígeno. Mester a hasi e tèst antígeno maksimalmente 24 ora promé ku salida.
For di 18 di mart di e aña akí, Boneiru ta den lockdown pa dos siman pa motibu di e kantidat haltu di infekshon. Djaweps último gezaghèber Edison Rijna a prolongá e lockdown ku dos siman te 16 di aprel 2021. Pa motibu di e kantidat haltu di infekshon, kuido di e isla ta bou di preshon. Siman pasá a hiba sinku pashènt di COVID di Boneiru hòspitalnan pafó di e isla. P’esei habitantenan i bishitantenan mester tene nan mes na e medidanan básiko.
Pa mas informashon tokante e kondishonnan di karentena: www.bonairecrisis.com
