E último simannan e kantidat di kaso di dengue na Boneiru a subi. Esaki departamento di Salubridat Públiko ta duna di konosé. For di komienso di aña nobo ya kaba a konstatá 24 kaso di dengue. Den e último tempu masha hopi áwaseru a kai na nos isla, i esaki a kondusí na un oumento di e kasonan di dengue. Departamento di Salubridat Públiko ku énfasis ta hasi un yamada riba tur hende pa tuma medida pa evitá ku dengue ta sigui plama.
Un persona ku dengue mayoria biaha tin keho leve. Pero por sosodé tambe ku un hende ku dengue ta haña keho grave i ku e mester keda interná den hòspital. Esaki a pasa algun biaha na Boneiru den e lunanan tras di lomba. Tin kuater tipo di dengue. Na Boneiru, banda di tipo 2, awor a konstatá tipo 3 tambe. Un hende ku tabatin dengue, ta protehá kontra e tipo ei, pero no kontra e otro tiponan.
Dengue ta plama via hende. E sangura Aedes aegypti, konosí tambe komo e sangura di dengue, ta transmití e vírùs. No ta tur sangura Aedes aegypti ta kargadó di e vírùs di dengue. Ora bo tin dengue i e sangura di dengue pika bo, despues di esei e sangura por hasi un otro hende malu.
Ta importante pa e sangura di dengue no haña chèns pa pika hende. Bisti paña ku koló kla ku ta tapa bo kurpa bon. Usa un ‘spray’ òf un krema kontra sangura ku ta kontené minimalmente 30% di DEET. Un produkto ku DEET ta sòru pa un protekshon di 5 pa 6 ora.
Hasi uso di skrin di manera ku sangura no por drenta bo kas. Tene tur bentana i porta será. Prinsipalmente mainta tempran i tramèrdia e sangura di dengue ta aktivo. P’esei drumi semper bou di un muskitero òf sòru pa bo kamber di drumi ta liber di sangura.
E sangura di dengue ta biba i brui prinsipalmente den kas i kurá di hende. E sangura ta pone su webunan den ophetonan ku ta kontené awa ku ta para ketu, manera baki di plèstik, tayer di outo, bòter, bleki i hèmber ku awa di yobe aden. Deshasí di e artefaktonan akí. Asina bo ta evitá ku e sangura di dengue por brui den nan.
Tapa tur baki òf barí ku bo ta warda awa aden pa mata òf bestia. Pa esaki bo ta usa un paña òf skrin kontra sangura ku bo ta span ku un elastik rònt di e parti ku ta habrí.
E inspektornan di departamento di Salubridat Públiko ta kontrolá tur kaminda na nos isla pa wak si tin lugá di brui di e sangura di dengue. Nan ta trata e lugánan di brui ku produktonan kontra insekto. E inspektornan ta duna informashon tambe tokante kiko hende por hasi pa evitá ku sangura di dengue ta brui den nan kurá òf den nan kas.
Pa konseho tokante molèster di sangura, tratamentu di barí di awa i renbak, yama e number di telefòn 715 – 5324 di departamento di Salubridat Públiko.
