Durante e Festival di Kanto Krioyo ku a tuma lugá di 9 te ku 12 di april na Stadion Antonio Trenidad, OLB/SKAL a lansa ku eksito e kampaña piloto di registrashon “Kultura ta mi”. E kampaña akí ta enfoká riba registrá tur hende ku ta envolvi ku arte i kultura, pa nan por forma un database aktual di artista i kulturista na Boneiru.
Durante e dianan di e festival, nos a logra registrá mas ku 40 hende den apenas dos dia, nos a sera e 4 dianan ku sigur 55 registrashon i tur dia tin mas hende ta sigui registrá. E grupo di kolaboradónan ku tabata na stadion a traha ku dedikashon pa informá i motivá partisipantenan di e festival pa registrá nan mes.
Na total nos a distribuí 100 flyers, nos a regalá 65 t-shirt (inklusivo 15 pa mucha) i 50 yabero ku logo di “Kultura ta mi” na finalistanan i otro partisipantenan di e festival. Tur hende ku a registrá a risibí un t-shirt komo muestra di apresio i pa nan tambe sinti ku di bèrdat nan ta forma nos Kultura.
Un danki ta bai na Komishon Kanto Krioyo Rincon ku a koopera engrande ku e promoshon di e kampaña i MC Aimed Ayoubi a sòru pa durante di e festival e informá ku tin e posibilidat pa registrá. PA loke ta trata e festival di mucha tur mucha a risibi un t-shirt i flyer pa nos artista hobennan tambe registra. E petishon a bai pa nan mayornan yuda nan ku e registrashon.
E komunidat a kontestá hopi positivo riba e kampaña. Artista i kulturista a ekspresá ku nan ta habrí pa registrashon i tambe ta deseá pa mira kolaborashon i partisipashon den seshon di diskushon, tayer i otro tipo di enkuentro. E registrashon ta un promé paso importante pa konektá i fortalesé e sektor di kultura lokal.
OLB/SKAL ta gradisí tur hende ku a kontribuí den e kampaña akí. Un petishon ta bai na hinter komunidat di arte i kultura pa registrá bo mes pa nos sa ken bo ta pasó ta un parti importante di nos patrimonio kultural!
Pa mas informashon i pa registrá tuma kontakto ku SKAL na number di telefòn +5997175330 òf +5997965677 òf meil segni.bernardina@bonairegov.com.
