Aruba, Boneiru i Kòrsou ta traha huntu pa sigui desaroyá i fortifiká papiamentu (Boneiru/Kòrsou) i papiamento (Aruba). Ku un akuerdo di kooperashon, e tres islanan ta traha na mas visibilidat, balorashon i vitalidat di e idioma.
Gobernantenan di Aruba, Boneiru i Kòrsou a firma e akuerdo di kooperashon na yüli 2025. For di e momentu di firmamentu, Boneiru a ehersé presidensia di e kooperashon akí pa ún aña.
For di òktober 2025, un grupo di trabou konsistiendo di representantenan di e tres islanan, ta traha na un programa di trabou ku vários proyekto pa sigui fortifiká uso i promoshon di papiamentu i papiamento.
Un di e proyektonan, ku riba kua ta bai pone énfasis den e periodo ku ta bini, ta Tradukshon Literario. E tres islanan ta traha huntu na un programa ku mester pone mas buki di kalidat haltu disponibel na propio idioma. Relashoná ku esei ta analisá ophetivonan, enfoke i e posibilidatnan pa sigui amplia e kantidat di título ku tin aktualmente.
Mas buki ta nifiká mas oportunidat pa nos idioma. Un selekshon amplio di buki pa mucha, hóben i adulto ta stimulá e plaser pa lesa, fortifiká abilidatnan lingwístiko i sigurá ku generashonnan nobo ta sigui apresiá e idioma. Ademas e bukinan aki ta kontribuí na traspasá storianan kultural, tradishon i identidat lokal. Nan ta sostené enseñansa multilingual i desaroyo di idioma. Tambe nan ta ofresé oportunidat pa eskritor, traduktor i otro profeshonalnan kreativo.
For di yüli 2026 ta pasa presidensia di e kolaborashon pa Aruba. Durante un aña, Aruba ta kontinuá ku koordinashon di e aktividatnan konhunto di e kolaborashon ABC.
E traspaso di presidensia ta suprayá e kompromiso konhunto di Aruba, Boneiru i Kòrsou pa papiamentu i papiamento. Agrupando konosementu, eksperensia i inisiativa dentro di e region di ABC, nos ta konstruí huntu un futuro sostenibel pa nos idioma.
