Entidat públiko Boneiru (EPB) ta hasi un yamada riba tur suidadano pa partisipá na e konsultashon tokante kambio di Lei entidatnan públiko BES i Lei finansa entidatnan públiko BES (WolBES i FinBES). Ku e kambio di lei akí ministerio di Asuntunan di Interior i Relashonnan den Reino ke mehorá e relashonnan intergubernamental entre Boneiru i e parti oropeo di Hulanda. Bo bos ta di importansia esensial den e proseso akí. WolBES i FinBES, ku for di 10 di òktober 2010 ta na vigor, pa un gran parti ta determiná e strukturashon riba tereno di derecho konstitushonal i tereno finansiero di entidat públiko Boneiru.
Ku e kambionan proponé, algun adaptashon importante ta keda implementá:
- Lo oumentá e kantidat di miembro den Konseho Insular.
- Lo amplia e kantidat di diputado den Kolegio Ehekutivo.
- Funshon di Representante di Reino ta kaduká, kaminda ta repartí su tareanan di nobo entre e minister i gezaghèber, òf nan ta kaduká.
- Ta bin un prosedura nobo pa nombrashon di gezaghèber, ku un ròl mas grandi pa Konseho Insular.
- Ta fleksibilisá supervishon riba Boneiru pa sierto desishonnan, manera desishon relashoná ku personal.
Ta adaptá supervishon riba maneho finansiero i maneho di presupuesto di Entidat Públiko Boneiru.
Entidat públiko Boneiru ta duna balor grandi na bo enbolbimentu ku e kambio importante di lei akí i ta ofresé dos manera simpel ku bo por entregá bo reakshon:
- Bo por manda bo reakshon online pa ministerio di Asuntunan di Interior i Relashonnan den Reino riba wèpsait di konsulta via internèt.
- Òf manda bo opinion pa Kolegio Ehekutivo pa medio di manda un email na consultatiewolbesfinbes@bonairegov.com. Kolegio Ehekutivo lo pone tur email ku nan haña huntu i manda e reakshon konhunto akí pa e ministerio. Si bo ta preferá di manda un reakshon por eskrito, bo por entregá esaki personalmente na e siguiente adrès: Kaya Industria Pariba 28, na atenshon di Ofisina di Relashonnan Gubernamental enkuanto WolBES / FinBES.
Kolegio Ehekutivo ta supliká bo kordialmente pa manda bo reakshon promé ku 15 di séptémber 2023. Naturalmente bo por manda e mesun reakshon pa tantu e ministerio komo pa Kolegio Ehekutivo. Pa mas informashon tokante e kambio proponé i e proposishon di lei di WolBES i FinBES bo por bishitá Overheid.nl via e página .
"Consultatie Herzieningswet WolBES en FinBES" (internetconsultatie.nl). Pa pregunta tokante otro tópikonan nos ta invitá bo pa hasi uso di e métodonan kustumbrá di kontakto via nos wèpsait https://bonairegov.com/. Nos ta spera di risibí bo aporte balioso i di enbolbí bo ku e kambio importante di lei akí. Huntu nos por ehersé un influensia positivo riba Boneiru su futuro.
