Riba enkargo di Entidat Públiko Boneiru, Banko Mundial a inisiá un investigashon tokante potensial senarionan di kresementu sostenibel pa nos isla. E investigashon lo brinda Kolegio Ehekutivo sosten na momentu di hasi eskohonan stratégiko relashoná ku desaroyo sostenibel. Kolegio Ehekutivo ta duna balor na optené mas i mihó konosementu pa loke ta trata e potensial senarionan akí pa tuma desishonnan bon fundá pa futuro di nos isla.
A forma e investigashon a base di un seri di sup-investigashon; un kolekshon di data, análisis i un enkuesta (personal i online) bou di habitantenan tokante kon nan ta pensa tokante nan isla. Tambe ta bini entrevista ku ekspertonan i stakeholdernan riba diferente tereno den nos komunidat. Banda di esei den e di tres kuartal ta bini seshonnan di informashon pa papia tokante e promé resultadonan for di e diferente sup-áreanan. Ku e resultadonan Entidat Públiko Boneiru ke hasi evidente kua eskoho lo tin kua efekto riba desaroyo di nos isla. E metanan relashoná ku esaki ta pa via instrumentonan di midimentu ophetivo mehorá kalidat di bida di nos habitantenan, manehá e patrimonio natural i kultural di nos isla na un manera korekto i hasi e efektonan di turismo riba nos isla komprendibel i transparente.
Entretantu a kuminsá ku e kolekshon di data i e promé entrevistanan di Banko Mundial ku ekspertonan i stakeholdernan a tuma lugá. Tambe durante e siman tras di lomba un tim di Banko Mundial a kapasitá enkuestadónan lokal pa personalmente pasa den e lista di pregunta serka habitantenan. Aparte di esaki e lista di pregunta akí ta optenibel online i lo distribuí esaki via sms. Lo trata tur kontesta riba e enkuesta den un forma estriktamente konfidensial.
‘Ta di gran importansia ku Boneiru ta desaroyá su mes na un manera duradero i responsabel. Nos ta na un punto krusial i a base di bon informashon nos mester tuma desishon bon pensá pa futuro di nos isla. Pa por tuma e desishonnan akí, ta importante pa disponé di dato i konosementu korekto. Pa e motibu akí nos ta hopi kontentu ku Banko Mundial tabata dispuesto pa hasi e investigashon akí i nos ta ansioso pa mira e resultadonan’, segun Hennyson Thielman, diputado di Desaroyo Ekonómiko, Turismo i Finansa den Kolegio Ehekutivo di Boneiru.
Diputado James Kroon, (Infrastruktura i Medio Ambiente): ‘Nos ta mira nos isla krese i nos sa ku ta importante pa hasi eskoho konsiente pa futuro. E investigashon akí ta bai yuda nos ku esei. Mi ta hopi kontentu ku Banko Mundial no ta bai enfoká solamente riba turista ku ta bishitá nos isla, pero tambe riba nos habitantenan i e impakto ku e kresementu akí tin riba nan.’
E ‘Technical Assistance Program for Disaster Risk Financing and Insurance in Caribbean Overseas Countries and Territories (OCTs)’ (Programa pa asistensia tékniko pa loke ta trata finansiamentu i seguro di riesgonan di kalamidat na Paisnan i Teritorionan Ultramar (LGO) karibense) ku Union Oropeo ta finansiá, ta paga pa gastunan di e programa. E ‘Global Facility for Disaster Reduction and Recovery (GFDRR) (Institushon mundial pa redukshon di riesgo di kalamidat i rekuperashon) ta manehá e programa. GFDRR ta forma parti di e Resilience, Sustainable Energy and Marine Biodiversity Program (RESEMBID) (Programa pa resiliensia, energia duradero i biodiversidat marino), ku e Paisnan i Teritorionan Ultramar den Karibe ta ehekutá.
Gobièrnu di Boneiru ta invitá tur habitante di Boneiru pa yena e enkuesta i di e forma akí laga nan bos resoná. Pa akomodá e diversidat den nos komunidat boneriano, e enkuesta lo ta disponibel na kuater idioma: hulandes, papiamentu, spañó i ingles. Esaki ta e lenk pa e enkuesta: https://bonairegov.com/pa/habitante/enkuesta-banko-mundial
