International Desk di Boneiru ta selebrá su promé aña

Riba promé di jüli 2022, International Desk (IDB) a wordu lantá bou di e kabinet di gezaghebber. IDB ta fungi komo e brug entre Boneiru i Union Oropeo. Nos ta orguyoso ku durante e promé aña di IDB, nos a logra proyectonan bunita pa benefisiá nos isla.

IDB ta ofresé tur esnan bibando na Boneiru akseso na informashon tokante fondonan di Union Oropeo i di Nashonnan Uní ku nos komo isla ta bini na remarka p’e. IDB ta apoyá su kolaboradónan for di komienso, durante i te na final di kada un di nan proyecto. IDB ta kolaborá ku eskritornan pa guia organisashonan lokal ku skirbimentu di nan proyekto. Di e manera aki, IDB a eksitosamente organisá tayer di skirbimentu di proyecto pa nos eskritornan di proyekto lokal.

Un di e programanan di mas remarkabel ku nos isla tin e honor pa kolaborá aden ta RESEMBID (Resilience, Sustainable Energy and Marine Biodiversity Programme). Durante e promé aña di IDB a kolaborá huntu ku STINAPA ku nan proyecto di RESEMBID na Lac Bay di un balor di EUR 750.000. Tambe por menshoná ku RESEMBID a finansiá un raport di Wereldbank ku e tema di límite di kambionan aseptabel i kapasidat di akohida (limits of acceptable change and carrying capacity) pa Boneiru. Den e raport aki ta wordu indiká na ki manera Boneiru por desaroyá su futuru na un manera mas sostenibel.

IDB ta orguyoso di a organisá un ‘site event’ den kolaborashon ku hemana isla Korsou, durante e prestigioso konferensia di maneho di awa organisá pa Nashonnan Uní, pa tur islanan rond mundu ku ta pertenesé na pais- i teritorionan Ultramar, pa komparti nan reto i praktikanan ariba tereno di maneho di awa.  

Sin laga’fó, nos ta orguyoso ku Boneiru a wordu representá durante e ultimo aña pa dos hóben: Michélin Padmore i Mitch de Palm komo parti di Overseas Countries and Territories Youth Network (OCT-YN). Esaki ta un grupo di hóben di tur parti mundu ku ta represent nan isla na Union Oropeo. Nos ta sumamente orguyoso ku Boneiru ta e isla na unda tabatin e interes di mas grandi bou di e hóbennan pa partisipá den e programa aki. Nos ta sigur ku e futuru di Boneiru ta den bon man.

Pabien Boneiru ku e promé aniversario di International Desk Bonaire. Ban sigui kolaborá ku proyectonan pa hiba nos isla pa dilanti.

Nos ta invitá henter Boneiru pa bishita nos websait: https://bonairegov.com/idb/ i sigui nos riba Facebook: International Desk Bonaire.