Durante un enkuentro informativo mas òf ménos 15 organisashon a mustra interes pa partisipá na ‘Bo granito pa Boneiru – BGPB’. Anteriormente ‘Bo Granito pa Boneiru’ tabata konosí bou di e nòmber ‘Servisio pa Komunidat’ (Maatschappelijke Diensttijd Bonaire – MDT). BGPB ta un programa kaminda hóbennan di 12 pa 30 aña ta haña oportunidat pa desaroyá nan talento, traha huntu i siña kos nobo. Pa medio di partisipá na BGPB e hóbennan ta kontribuí ku nan granito na nos komunidat.
A tene e enkuentro informativo di kuminsamentu di yüli pa enkurashá organisashonnan i empresanan nobo pa partisipá na e programa. Via BGPB organisashonnan i empresanan tambe ta haña oportunidat pa duna un aporte pa medio di organisá proyekto pa hóben. Representantenan di e organisashonnan ku tabata presente a reakshoná entusiasmá riba e posibilidatnan pa partisipá.
Karel Partoredjo ta konsehero di maneho na Direktorado di Komunidat i Kuido i e ta responsabel pa e programa di BGPB. ‘Durante e seshon di informashon a bira bon kla ku algun organisashon sa kaba kon nan por hasi petishon pa sèn pa e proyektonan. Awor e organisashonnan akí ta bai hasi un petishon pa un proyekto nobo di BGPB. Otro organisashonnan a deklará ku ainda nan ta buskando e forma korekto pa organisá un proyekto pa hóben. Banda di esaki tin organisashon tambe ku ke tuma tempu pa skirbi un bon plan pa un proyekto,’ segun deklarashon di e konsehero di maneho.
E konsehero di maneho ta spera ku mas organisashon ta méldu nan mes pa BGPB. ‘Ta importante pa e organisashonnan ku ke hasi algu pa nos hóbennan, mèldu nan mes. Hóbennan meresé un chèns pa deskubrí nan talentonan i siña kon pa traha huntu ku otronan. Ta importante tambe ku nan ta siña hasi algu bèk pa komunidat. Pa esaki nan tin mester di yudansa di organisashonnan, empresanan i gobièrnu. Di e forma akí nos ta siña e hóbennan kon pa para na un manera positivo den bida.’
Organisashonnan òf empresanan ku ke partisipá na BGPB por manda un email na doemee@mdt-bonaire.com òf manda un app na e number +599 796 2999. BGPB ta un kolaborashon entre entidat públiko Boneiru, MDT Hulanda i ministerio di Enseñansa, Kultura i Siensia.
