Tres luna pasa a finalisá e promé fase di transporte di sushi biomédiko. Den siman di 7 di yüli a kuminsá ku fase 2. Den e fase akí ta transportá 7 kònteiner ku sushi biomédiko via laman pa Oropa. Den fase 1 a usa sinku konteiner. Kompania Renewi ta hiba e sushi via Hulanda pa Bélgika, kaminda ta kima e sushi na un manera seif.
Den e simannan ku ta tras di lomba tabatin basta preparashon. A sòru por ehèmpel pa henter e kadena logístiko ta bon organisá i a kumpra basta material spesial pa paketá. Un kontratista lokal ku tin eksperensia ku e tipo di trabou akí ta hasi gran parti di e trabou.
Den sushi biomédiko por tin supstansia dañino òf bakteria òf virùs ku por okashoná malesa, esakinan por tin konsekuensia pa hende i pa medio ambiente. Tin lei i regla spesial kon pa atendė ku sushi biomėdiko pa esaki sosodė na un manera seif i kouteloso.Ta p’esei personal di e partnernan mas importante den e kadena akí, esta RMD, Selibon i Fundashon Mariadal, a haña un treinen spesial den e periodo ku a pasa.
Dos siman pasá a kuminsá paketá e sushi di nobo den barí spesial. E barínan akí a yega Boneiru promė ku esei for di Hulanda. Segun Selibon tur kos ta kana segun planifikashon. E transporte via barku ta tuma lugá den dos etapa, a karga e promė boto ku 4 konteiner den fin di siman tras di lomba, sobrá konteiner ta bai ku barku aki dos siman. Ku transporte di e sushi akí Boneiru ta sigui traha di forma seif na protekshon di salú i di medio ambiente.
