Entidat Públiko Boneiru, Bonaire International Airport i Tourism Corporation Bonaire (TCB) ta traha huntu pa laga implementashon di e Visitor Entry Tax dia 1 di yüli kana mas bon posibel. Dunamentu di informashon korekto na tur ku ta enbolbí ta hopi importante den e fase akí.
Awor akí a kontestá e preguntanan ku ta bini mas tantu dilanti tokante e Visitor Entry Tax i por haña nan riba e wèpsait bonaireisland.com
For di 1 di yüli e Visitor Entry Tax ta drenta na vigor i e ta konta pa tur hende ku ta bishitá Boneiru. E no ta konta pa habitantenan di Boneiru ku ta biba ofisialmente na Boneiru. Wak den e skema akí bou pa mas informashon.
For di fin di luna di yüni bishitantenan por paga e Visitor Entry Tax online via e wèpsait bonaireisland.com. Inisialmente por paga e Visitor Entry Tax online solamente ku un creditcard ainda. Den un fase mas despues ta añadí otro posibilidatnan di pago, manera iDeal. Na aeropuerto mes por paga ku vários karchi, manera creditcard, karchi di bankomátiko i maestro-card. No por paga ku sèn kèsh.
Bishitantenan ku ta drenta Boneiru ku boto, tambe lo tin ku paga e Visitor Entry Tax.
E operadornan di ‘tour’, kompanianan aéreo, partnernan i partidonan enbolbí na Boneiru, ku regularidat ta haña aktualisashon i notisia tokante e Visitor Entry Tax. Di e manera akí ta kompartí e informashon korekto den un forma amplio i ta hasi posibel ku e bishitante di Boneiru ta prepará su mes bon pa su biahe.
Bo ke sa mas tokante e Visitor Entry Tax? E ora ei wak riba e wèpsait bonaireisland.com, yama TCB na number di telefòn +599 717 8322 òf manda un email na marketing@tourismbonaire.com
Esaki ta un komunikado pa prensa di Entidat Públiko Boneiru den kolaborashon ku Tourism Corporation Bonaire.
