Di 13 te ku 16 di mei 2026 un grupo di 20 hóben a partisipá na un biahe di inspirashon pa Kòrsou, komo parti di e proyekto hubenil Kibra i Konstruí: Un Biahe den mi Rais. Den e proyekto akí ta investigá kon e patronchinan di afekshon ku hóbennan ta eksperensiá awendia, ta relashoná ku pasado di sklabitut.
Entidat Públiko Boneiru i Mental Health Caribbean (MHC) ta ehekutando e proyekto konhuntamente. E ta forma parti di e Agènda di Pasado di Sklabitut Boneiru i ta inkluí den e programa Fortifikashon di interkambio di patrimonio i kultura karibense. Intenshon di e programa akí ta pa kontribuí na salú mental di hóbennan i nan famianan.
Durante kuater dia kultura, historia, arte, konekshon i inspirashon tabata sentral. E biahe a brinda e hóbennan oportunidat pa deskubrí sitionan nobo, siña mas tokante e pasado di sklabitut kompartí i atkirí eksperensia ku nan lo inkorporá den nan propio obra artístiko.
Durante e programa e hóbennan a bishitá entre otro Museo di Tambú / Shon Cola, Kas di Pal’i Maishi, Museo Tula, Kura Hulanda, Komité di Konmemorashon Pasado di Sklabitut, Curaçao Interactive Museum i 7.1 Art Gallery. Tambe nan a sera konosí ku sitionan históriko den Punda i Otrobanda durante un kaminata bou di guia di Tyrone Brunken. Ademas tabatin espasio pa enkuentro, diálogo, rekreo i reflekshon konhunto.
E biaha di inspirashon a transkurí eksitoso. E hóbennan a haña konosementu balioso tokante historia, kultura i identidat di Kòrsou. Pa medio di bishita, kòmbersashon i eksperensia nan a haña konosementu nobo di temanan manera pasado di sklabitut, patrimonio, konekshon, resilensia, patronchinan familiar i rekuerdonan kompartí.
E impreshonnan atkerí ta forma un base importante pa e obra artístiko ku e hóbennan ta bai sigui traha riba dje. Den e obra artístiko di arte nan lo ekspresá nan eksperensia, konosementu nobo di e pasado di sklabitut i nan efektonan duradero riba salú mental i patronchinan familiar di forma kreativo.
E trayekto ta kontinuá despues di e biahe di inspirashon. Den e periodo benidero e hóbennan lo traha riba nan obra artístiko, ku nan lo eksponé riba 20 di yüni 2026 na Mangazina di Rei. Di e forma akí e biahe di inspirashon ta haña un lugá permanente i otronan tambe por benefisiá di loke e hóbennan a mira, siña i sinti.
E biahe tabata dirigí riba deskubrí, eksperensiá i konektá. Pa e hóbennan e no tabata solamente un eksperensia kultural, pero tambe un momento di kresementu, konsientisashon i kreashon di eksperensianan konhunto.
