For di 1 di yüli 2025 mayornan i tutornan ku tin yu na skol básiko por hasi petishon pa un kompensashon di $300,00 pa artíkulo pa skol i unifòrm di skol pa aña eskolar 2025-2026. Mayornan di studiantenan di MBO menor di edat, por hasi petishon pa un kompensashon di maksimalmente $400,00 pa sèn di buki. Studiantenan di MBO mayor di edat por hasi petishon pa sèn di buki nan mes.
Por hasi petishon pa kompensashon pa artíkulo di skol, unifòrm di skol i sèn di buki pa MBO solamente online riba www.bonairegov/back2school. Mayornan, tutornan i studiantenan di MBO mayor di edat ku tin problema pa hasi petishon online, por haña ayudo. Den luna di yüli i ougùstùs for di djaluna te ku djaweps nan por yama e number di telefòn 701 1055 for di 09:00 – 12:00 or i for di 14:00 – 16:00 or. Ta posibel tambe pa app e number akí òf pa manda un email na schoolbenodigdheden@bonairegov.com
Ora di hasi petishon online ta importante pa manda tur dokumentu ku nan ta pidi mesora huntu ku e petishon. Si un persona ku ta hasi petishon no manda mesora tur dokumentu ku nan ta pidi, e empleadonan mester tuma kontakto kuné. E ora ei e empleadonan ta warda te ora tur dokumentu di e persona ku ta hasi petishon drenta, pa prosesá e petishon. Esaki ta kondusí na retraso.
E konseho ta pa entregá e petishon mas rápido posibel i no warda te ora e aña eskolar nobo kuminsá. Prosesamentu di un petishon ku tur dokumentu ku nan ta pidi ta dura mas òf ménos 6 siman. Pa e kondishonnan pa hasi petishon pa kompensashon pa artíkulo pa skol, wak riba www.bonairegov/back2school. Riba e wèpsait akí nan ta menshoná tambe e dokumentunan ku ta nesesario pa hasi e petishon.
