Ta kontinuá ku e inisiativa di Kuminda di Skol Saludabel (Gezonde Schoolmaaltijden). Kuminda di Skol Saludabel ta un inisiativa di Entidat Públiko Boneiru (EPB). GGD Bonaire / Salubridat Públiko ta dirigí e inisiativa akí. Den e aña eskolar nobo tambe, tur dia alumnonan na enseñansa básiko públiko i enseñansa sekundario ta haña fruta fresku i variá.
Ku Kuminda di Skol Saludabel, EPB ke pèrkurá pa tur mucha na Boneiru haña e oportunidat pa krese na un manera saludabel i desaroyá nan mes bon. Kuminda saludabel ta yuda muchanan krese, siña i ta aktivo na un manera sano. Tambe kuminda saludabel ta yuda prevení problema ku salú.
Kuminda saludabel na skol
Tur alumno den enseñansa básiko públiko i enseñansa sekundario (mas o ménos 4300) tur dia ta haña fruta fresku i variá na skol. Danki na e kolaborashon ku skol, suministradónan lokal i otro sosionan, via Kuminda di Skol Saludabel nos por ofresé fruta na alumnonan.
Ademas alumnonan di Rayo di Solo, Kolegio Strea Briante i Speciale Lesplaatsen di Scholengemeenschap Bonaire ta haña un desayuno mas salú. Stichting Voeding op School ta haña supsidio tambe pa ofresé kuminda di pan ku belèg na alumnonan ku no por bai skol ku kuminda.
Ta sigui amplia e inisiativa
E añanan ku ta bini ta amplia Kuminda di Skol Saludabel gradualmente. E meta ta pa hasi di esaki un inisiativa mas amplio pa kuminda saludabel i un estilo di bida saludabel na skol.
Relashoná ku esei, GGD Bonaire / Salubridat Públiko ke ofresé entre otro mas bèrdura i fruta lokal i enbolbí mayornan i kuidadónan mas. Tambe ta bini mas atenshon pa kuminda saludabel i un estilo di bida saludabel durante aktividatnan na skol, manera Fiesta di Salú i aktividatnan di fakansi. Ademas ta sostené skolnan pa ofresé eskohonan mas saludabel den kantina.
Un ambiente di skol saludabel nos ta krea huntu
P’esei GGD Bonaire / Salubridat Públiko ta traha huntu ku skolnan, suministradónan i otro sosionan. Huntu nos ta pèrkurá pa muchanan na Boneiru haña e oportunidat pa krese na un manera sano i desaroyá nan mes mas mihó posibel.
Pa pregunta, idea i sugerensia tokante Kuminda di Skol Saludabel, por tuma kontakto ku nos via bonsaluggd@bonairegov.com òf (+599) 715 3524.
