Dentro di poko Kampionato Mundial di futbòl ta ranka sali na Merka, Canada i Mexico. GGD Bonaire / Salubridat Públiko ta hasi un yamada riba nos habitantenan ku ta bai Kampionato Mundial, pa regla nan preparashon di salú na tempu. Pa habitantenan ku lokalmente ta bai sigui e weganan den bar spesial pa amantenan di deporte, den hóreka òf durante un evento tambe ta konta: gosa huntu ta mas plasentero ainda si esaki ta tuma lugá na un manera seif.
Bo ta bai Mundial 2026?
E ora ei traha un sita na tempu pa un konseho pa biahero. Dependiente di na unda bo ta bai i pa kuantu tempu, i di bo situashon personal, bakunashon òf konseho adishonal di salú por ta nesesario pa bo i bo famia.
Kontrolá bo bakunashon kontra sarampi
Den diferente pais, inkluyendo Merka, Canada i Mexico, aktualmente tin brote di sarampi. Sarampi ta sumamente kontagioso i e ta plama fásilmente na sitionan kaminda ta drùk, manera na aeropuerto, den stadion òf kaminda tin evento.
Un bakunashon di BMR (BMR ta para pa kachete (bof), sarampi (mazelen) i roihun (rodehond)) ta protehá kontra sarampi. Di e manera akí bo no ta bira malu asina lihé i bo ta prevení plamamentu di e vírùs.
Na Boneiru e muchanan ta haña e bakunashon akí via e Programa di Bakunashon di Reino (Rijksvaccinatieprogramma, RVP), pero no tur hende a bai pasa e angua akí. Pa e motibu akí GGD Bonaire / Salubridat Públiko ta konsehá biaheronan pa promé ku nan biaha kontrolá si e famia ta sufisientemente protehá kontra sarampi.
Bo tin duda tokante bo státùs di bakunashon? Tuma kontakto ku GGD Bonaire / Salubridat Públiko òf ku bo dòkter di kas.
Gosa na un manera seif di Mundial 2026 – na kas i riba kaya
Durante eventonan grandi i momentunan di sali dibertí, ta importante pa dediká atenshon tambe na bo salú i salú di otronan.
GGD Bonaire / Salubridat Públiko ta duna e siguiente tepnan:
• Bebe na midí: interkambiá kada bibida alkohóliko ku awa, i kome sufisiente promé ku bo bai bebe;
• Pensa riba hasi relashon seksual na un manera seif. Den kaso ku bo a kore riesgo pa un malesa transmití seksualmente (soa), e ora ei bai hasi tèst grátis na e konsulta di salú seksual;
• Paga tinu riba siguridat di kuminda i skohe pa kuminda i kos di bebe ku nan a prepará i warda na un manera higiéniko;
• Keda kas si bo ta malu òf ora bo tin keho;
• Laba bo mannan regularmente i sòru pa un bon higiena.
Bo tin pregunta òf bo ke traha un sita?
Tuma kontakto ku GGD Bonaire / Salubridat Públiko via (+599) 715 53 24 pa:
• konseho grátis pa biahero;
• bakunashon;
• pregunta tokante sarampi;
• konseho general di salú.
Yama òf manda un whatsapp pa e konsulta di salú seksual via (+599) 790 73 73 pa konseho òf pa un tèst grátis di SOA.
Protehá bo salú, pa bo biba e Blue Wave!
Sali seif i pasa un bon mundial (WK) di parti di GGD Bonaire / Salubridat Públiko di Entidat Públiko Boneiru
