Relashoná ku e retiro resien di 2 diputado, gezaghèber di Boneiru, sr John Soliano, temporalmente ta supstituí Kolegio Ehekutivo. E supstitushon (indeplaatstreding) akí ta reglá den e Lei di Entidatnan Públiko BES (Wet Openbare Lichamen - WolBES).
Dikon gezaghèber ta supstituí Kolegio Ehekutivo?
Den práktika, Kolegio Ehekutivo di Boneiru ta konsistí di 3 diputado. Lei ta preskribí ku den kaso ku tin ménos ku mitar di e kantidat di diputado den un entidat públiko den funshon, e ora ei gezaghèber ta supstituí Kolegio Ehekutivo. Esaki ta sòru pa gobernashon di e isla por kontinuá. Gezaghèber ta supstituí Kolegio Ehekutivo te na momentu ku Konseho Insular nombra mas ku mitar di e kantidat di diputadonan insular. Esaki ta nifiká ku asina ku nombra un (1) diputado insular mas, Kolegio Ehekutivo ta tuma enkargo atrobe di e gobernashon diario.
Kiko supstitushon (indeplaatstreding) ta nifiká?
Ku gezaghèber ta supstituí Kolegio Ehekutivo ta nifiká ku e ta tuma e tareanan i kompetensianan di Kolegio Ehekutivo over. Desishonnan ku Kolegio Ehekutivo tin ku tuma, awor ta na enkargo di gezaghèber ku komo úniko meta pa salbaguardiá kontinuidat di gobernashon. Gezaghèber ta hasi esaki den kolaborashon ku e diputado ku a sobra i e sekretario insular. Mas aleu e areglo di mandato ta keda na vigor, di manera ku empleadonan públiko ku tin e mandato por tuma i ehekutá sierto desishonnan. Ta trata akí prinsipalmente di prosesonan regular pa kua ta eksistí un kuadro legal òf un kuadro di maneho. Esaki ta nifiká ku e servisio regular di entidat públiko Boneiru na su siudadanonan ta kontinuá normalmente durante e periodo akí.
Ròl di gezaghèber
Den su ròl komo Kolegio Ehekutivo, gezaghèber ta aktua kuidadosamente. Komo órgano atministrativo gezaghèber ta un figura independiente i ku ta para riba polítika. A base di e kalidat akí e lo duna kontenido tambe na su ròl temporal.
E supstitushon lo keda na vigor te na momentu ku a nombra por lo ménos 1 diputado nobo. Nombramentu di e diputadonan nobo den Kolegio Ehekutivo ta un responsabilidat di e miembronan di Konseho Insular. Pa e motibu akí gezaghèber den un karta a pidi Konseho Insular pa mas rápido posibel nombra diputadonan nobo den Kolegio Ehekutivo. Entretantu Gezaghèber tabatin kontakto ku miembronan di Konseho Insular, kende lo hasi nan esfuerso pa nombra diputadonan nobo mas pronto ku ta posibel.
Asina ku tin mas informashon tokante nombramentu di diputadonan nobo, lo komuniká esaki.
