Resientemente ami, komo gezaghèber di Boneiru, a manda un karta pa e ministernan di Defensa i di Asuntunan di Eksterior. Motibu pa esaki tabata vários señal di preokupashon ku mi a risibí for di nos komunidat tokante e situashon internashonal, partikularmente e desaroyonan na Venezuela.
No tin kestion di menasa militar
E kobertura di notisia tokante e karta akí a lanta e impreshon serka sierto hende ku lo tin kestion di un menasa militar direkto. Mi ke enfatisá ku esaki no ta e kaso. Mi ta ripará sí ku e tipo di interpretashonnan akí ta kondusí na intrankilidat i insiguridat serka nos poblashon. Pa e motibu akí mi ta konsiderá ku ta importante pa duna klaridat tokante kontenido i intenshon di mi karta.
Petishon pa klaridat i sosten
Manera mi a formulá den mi karta, e mundu rònt di nos ta kambiando – den paisnan pegá ku nos tambe. E desaroyonan akí por tin konsekuensia pa Boneiru. Pa e motibu akí mi a haña ku ta nesesario pa, komo prekoushon, pidi e ministernan klaridat tokante e grado i e forma di sosten ku Boneiru por ferwagt di Reino den e tipo di situashonnan akí.
Trankilidat i siguridat na promé lugá
Mi intenshon ta i ta keda pa salbaguardiá siguridat, stabilidat i konfiansa di nos poblashon. Ta mi deber komo gezaghèber pa pensa adelantá i haña klaridat tokante protekshon i sosten di Reino.
