Kralendijk – Dia 13 di febrüari gezaghèber Edison Rijna a risibí e rapòrt di ‘dijkgraaf’ Hein Pieper tokante maneho integral di awa na Boneiru. Despues di e yobida fuerte i molèster di awa na luna di novèmber aña pasá gezaghèber Rijna a pidi ‘Waterschap Rijn & IJssel’ pa sosten i interkambio di konosementu.
Na kuminsamentu di aña 2023 un delegashon di funshonario di maneho di awa for di diferente órgano di maneho di awa a bishitá Boneiru. Un siman largu huntu ku empleadonan di direktorado di Planifikashon i Desaroyo di Entidat Públiko Boneiru nan a studia e infrastruktura di awa di nos isla i nan a papia ku hopi stakeholder pa haña un promé bista di e situashon. E rapòrt ta duna un enumerashon sólido di medida ku por tuma i ku mester tuma riba término kòrtiku pa yega na un maneho sostenibel i integral di awa na nos isla. Banda di esei e rapòrt ta trata tambe e término mediano i largu.
Gezaghèber Rijna: ‘E aserkamentu no tin solamente di haber ku kobamentu di roi òf ku hasimentu di e kapasidat di entre otro nos damnan mas grandi. Nos tin ku atendé integralmente ku esaki. Pa e motibu akí mi ta hopi agradesido na e órganonan di maneho di awa pa e rapòrt akí. Awor akí for di Entidat Públiko Boneiru nos ta bai ofresé e rapòrt na diferente ministerio na Hulanda pa pidi atenshon pa esaki i den e temporada binidero nos lo drenta den kòmbersashon mas aleu ku nan. Banda di esei nos ta bai hasi uso di e rapòrt akí na e konferensia di awa di Nashonnan Uní na fin di luna di mart na New York.’
Invershon den nos infrastruktura
Diputado James Kroon di Infrastruktura tambe ta kontentu: ‘E konsehonan eksperto i na mes momentu práktiko akí tambe lo yuda nos mesora kaba pa atendé ku algun di e problemanan den nos maneho di awa. Nos no por pèrmití nos mes un fluho di lodo un biaha mas manera na Harbour Village. Pero awor mester di e medionan nesesario ainda. Durante e último añanan nos poblashon a krese enormemente i esaki ta eksigí invershon grandi den nos infrastruktura, inkluso eliminashon di mantenshon atrasá i naturalmente konstrukshon di bibienda pagabel. Pero mi ta optimista ku den bon konsulta ku Den Haag nos ta bai haña un solushon pa esaki.’
E presidente di un di e órganonan di maneho di awa, e asina yamá ‘dijkgraaf’, señor Pieper a añadí: ‘Adaptashon na klima ta algu ku ta bini dilanti mundialmente i na tur isla. Mayoria di e islanan no tin sufisiente konosementu, eksperensia, medionan i forsa di ehekushon. Ku un aserkamentu akselerá i kombiná (twinning) Boneiru lo por ta un proyekto di prueba tambe pa hopi otro isla, pasobra nos tin tiki tempu. Otro islanan por bin kopia e konosementu akumulá i e solushonnan ku a hasi uso di dje den práktika akinan.’
