Den Haag – Durante e kòmbersashon ku gezaghèber Edison Rijna tabatin ku minister Ferd Grapperhaus di Hustisia i Siguridat un kantidat grandi di tópiko a bin dilanti ku komo liña kòrá oumentu di siguridat na Boneiru.
Nan a papia tokante fortifikashon di supervishon di frontera kaminda e ‘Multidisciplinaire Maritieme Hub Bonaire’ (Punto Sentral di Konekshon Marítimo Multidisiplinario Boneiru) ta bai hunga un ròl importante. Pa esaki resientemente e partidonan involukrá a firma un deklarashon di intenshon ku awor akí nan ta prosesando ku hopi determinashon. Nan a papia tambe tokante lantamentu di un Sentro Regional di Informashon i Ekspertisio Hulanda Karibense, intenshoná pa mehorá interkambio di informashon den e lucha kontra kriminalidat organisá supversivo.
Rijna a traspasá e mensahe tambe ku gezaghèbernan di e entidatnan públiko lo mester haña mas outoridat gubernamental, ku e burgemeesternan na Hulanda Oropeo komo ehèmpel. Ta trata e ora ei di por ehèmpel e posibilidat pa temporalmente prohibí un malechor pa bai su kas despues di violensia doméstiko òf seramentu di kasnan kaminda nan ta bende i/òf usa droga.
Grapperhaus a anunsiá ku ta bai kontinuá ku inisiativanan pa tene hóbennan riba e bon kaminda i alabes amplia esakinan. Ta amplia e ‘leerorkest’ ku a kuminsá komo proyekto piloto i hib’é otro skolnan tambe. Banda di esei ta amplia e proyekto ‘Abo so ta determiná ken bo ta’ pa hóbennan di entre 10 i 12 aña, bou di e nòmber AJB Junior. Esaki ta tuma lugá den koperashon ku Entidat Públiko Boneiru i Johan Cruyff Foundation.
Na final di e kòmbersashon minister Grapperhaus tabatin un sorpresa mas pa gezaghèber Rijna: e mandatario a entregá Rijna un mosaiko ku un imágen di Dama Hustisia. E mosaiko ta intenshoná pa personanan ku a duna un aporte spesial na mehorashon di nos estado di derecho.
